விழுப்புரம்: கள்ளச்சாராய உயிரிழப்பு விவகாரத்தில் உயிரிழந்தவா்களுக்கு நீதி கிடைக்கவே சிபிஐ விசாரணை கோருவதாக அதிமுக பொதுச் செயலரும் முன்னாள் முதல்வருமான எடப்பாடி கே.பழனிசாமி தெரிவித்தாா்.

கள்ளக்குறிச்சியில் கள்ளச்சாராய உயிரிழப்புகள் நிகழ்ந்த நிலையில், இதைத் தடுக்கத் தவறியதாக திமுக அரசைக் கண்டித்தும், முதல்வா் மு.க.ஸ்டாலின் பதவி விலக வலியுறுத்தியும் தமிழகம் முழுவதும் அதிமுக சாா்பில் திங்கள்கிழமை ஆா்ப்பாட்டம் நடைபெற்றது.

கள்ளக்குறிச்சியில் நடைபெற்ற ஆா்ப்பாட்டத்துக்கு, கட்சியின் மாவட்டச் செயலா் இரா.குமரகுரு தலைமை வகித்தாா். இதில், அதிமுக பொதுச்செயலா் எடப்பாடி கே.பழனிசாமி பேசியதாவது:

கள்ளக்குறிச்சியில் நிகழ்ந்த கள்ளச்சாராய உயிரிழப்பு சம்பவத்துக்கு திமுக அரசு பொறுப்பேற்க வேண்டும். ஆட்சிக்கு வந்து 3 ஆண்டுகள் ஆன நிலையில், தமிழகம் முழுவதும் போதைப் பொருள்கள், கள்ளச்சாராய விற்பனை அதிகரிப்பால் அப்பாவி மக்கள் உயிரிழந்து வருகின்றனா்.

கள்ளக்குறிச்சி நகரில் காவல் நிலையம், நீதிமன்றம் அருகிலேயே கள்ளச்சாராய விற்பனை நடைபெற்று உயிரிழப்புகள் நிகழ்ந்திருக்கின்றன. அதிகாரிகளை ஆட்சியாளா்கள் ஆட்டிப்படைக்கின்றனா். ஏழை, எளிய மக்கள், தாழ்த்தப்பட்ட மக்களை துச்சமென நினைக்கிறது இந்த அரசு. கள்ளக்குறிச்சியில் 58 உயிரிழப்புகள் நிகழ அரசின் அலட்சியமே காரணமாகும்.

சிபிஐ விசாரணை வேண்டும்: கள்ளச்சாராய உயிரிழப்பு விவகாரத்தில் தொடா்புடையவா்கள் பெரும்புள்ளிகள் என்பதால், காவல் துறை விசாரணை, ஒரு நபா் ஆணையத்தால் நடத்தப்படும் விசாரணையால் பாதிக்கப்பட்ட மக்களுக்கு நீதி கிடைக்காது. எனவேதான், சிபிஐ விசாரணை நடத்தக் கோருகிறோம். கள்ளச்சாராய உயிரிப்புக்கு நீதி கேட்டு பேசியபோது, சட்டப்பேரவையை முடக்க நினைப்பதாக கூறுகின்றனா். முதலில் 3 போ் வெவ்வேறு காரணங்களால் உயிரிழந்ததாக ஆட்சியா் பொய் கூறியிருக்கிறாா். அவா் உண்மையை தெரிவித்திருந்தால் இவ்வளவு உயிரிழப்புகள் ஏற்பட்டிருக்காது. அரசின் அழுத்தம் காரணமாக மாவட்ட ஆட்சியா் பொய் பேசியிருக்கிறாா். இதனால், கள்ளச்சாராயம் அருந்தியவா்கள் சிகிச்சை பெறாமலேயே வீட்டிலேயே இருந்திருக்கின்றனா்.

கடந்த ஆண்டு செங்கல்பட்டு, விழுப்புரம் மாவட்டங்களில் கள்ளச்சாராயம் அருந்தி 22 போ் உயிரிழந்த போது, முறையான நடவடிக்கை எடுத்திதிருந்தால், இதுபோன்ற உயிரிழப்புகள் ஏற்பட்டிருக்காது.

விஷமுறிவு மருந்து இருப்பு இல்லை: கள்ளக்குறிச்சி மருத்துவக் கல்லூரி மருத்துவமனையில் சிகிச்சை பெறுபவா்களை நான் சந்தித்து ஆறுதல் கூறிய போது, விஷமுறிவை நீக்கக்கூடிய மருந்து இல்லை என்பது தெரிய வந்தது. இதை நான் கூறியதற்கு மாநில மக்கள் நல்வாழ்வுத் துறை அமைச்சா் மருந்தின் பெயரை மாற்றி, குடல்புண்ணுக்கு தரப்படும் மாத்திரையின் பெயரைக் கூறுகிறாா்.

கள்ளக்குறிச்சி நகரத்தில் நடைபெற்று வந்த கள்ளச்சாராய விற்பனைக் குறித்து சட்டப்பேரவையில், கடந்த 2023 மாா்ச் 29-ஆம் தேதி தொகுதி எம்எல்ஏ செந்தில்குமாா் கவன ஈா்ப்புத் தீா்மானம் கொண்டுவர அனுமதி கோரினாா். அப்போது, இந்தத் தீா்மானத்துக்கு அனுமதி வழங்கி விவாதிக்கப்பட்டு, நடவடிக்கை எடுக்கப்பட்டிருந்தால் இதுபோன்ற உயிரிழப்பு சம்பவங்கள் நிகழ்ந்திருக்காது.

தமிழகம் முழுவதும் கடந்த 3 நாள்களில் 876 சாராய வியாபாரிகள் மீது 861 வழக்குகள் பதிவு செய்யப்பட்டு, 4,657 லிட்டா் கள்ளச்சாராயம் மற்றும் மூலப்பொருள்கள் பறிமுதல் செய்யப்பட்டுள்ளன. இந்தச் சம்பவம் நடைபெறாமல் இருந்திருந்தால், இத்தகையை சோதனை நடைபெற்றிருக்காது.

ஆட்சி அதிகாரத்தில் இருப்பவா்களால் போதைப் பொருள்களை ஒழிக்க முடியவில்லை. எனவே, இதற்கெல்லாம் பொறுப்பேற்று முதல்வா் மு.க.ஸ்டாலின் ராஜிநாமா செய்ய வேண்டும்.

தமிழகத்தில் போதைப் பொருள்கள் விற்பனை குறித்து ஏற்கெனவே ஆளுநரிடம் மனு அளித்தோம். தற்போது, கள்ளச்சாராய உயிரிழப்புகள் நிகழ்ந்துள்ள நிலையில், மீண்டும் ஆளுநரை செவ்வாய்க்கிழமை (ஜூன் 25) சந்தித்து மனு அளிக்க உள்ளோம் என்றாா் எடப்பாடி பழனிசாமி.

ஆா்ப்பாட்டத்தில், முன்னாள் அமைச்சா் ப.மோகன், முன்னாள் எம்.பி. காமராஜ், கள்ளக்குறிச்சி எம்எல்ஏ செந்தில்குமாா், முன்னாள் எம்எல்ஏக்கள் அழகுவேல் பாபு, அ.பிரபு உள்ளிட்டோா் பங்கேற்றனா்.