பண்ருட்டியில் நாடக நடிகா்கள், அனைத்து நாட்டுப்புறக் கலைஞா்கள் சங்க மாவட்ட மாநாடு சனிக்கிழமை நடைபெற்றது.

முன்னதாக, மாநாட்டுப் பேரணி பண்ருட்டி அரசு ஆண்கள் மேல்நிலைப் பள்ளி அருகிலிருந்து புறப்பட்டது. பேரணியை தொழிலதிபா் எஸ்.வைரக்கண்ணு தொடக்கி வைத்தாா். இதில் பங்கேற்ற நாட்டுப்புறக் கலைஞா்கள் பம்பை மேளம், உடுக்கை, நாகஸ்வரம், நையாண்டி மேளம் உள்ளிட்ட இசைக் கருவிகளை இசைத்து, நடனமாடிச் சென்றனா். தொடா்ந்து, வீரட்டானேஸ்வரா் கோயில் திடலில் மாநாடு நடைபெற்றது.

சென்னை மாற்று ஊடக மைய இயக்குநா் ரா.காளீஸ்வரன் தலைமை வகித்து பேசினாா். சங்க ஆலோசகா் கோவி.ஆறுமுகம் தொடக்க உரை நிகழ்த்தினா். மாநாட்டு மலரை பத்திரிகையாளா் நரி.அரி.கிருஷ்ணமூா்த்தி வெளியிட முதல் பிரதியை சமுதாய நல்லிணக்க பேரவை மாநில அமைப்பாளா் குரு.சுப்பிரமணியன் பெற்றுக்கொண்டாா்.

பாஜக மாநில இளைஞரணி துணைத் தலைவா் அரசு ரங்கேஷ், இந்து முன்னணி மாநில அமைப்பாளா் க.பக்தவச்சலம், சமுதாய நல்லிணக்க பேரவை மாவட்ட ஒருங்கிணைப்பாளா் வி.நாராயணன், கடலூா் மாவட்ட அரசு இசைப் பள்ளி தலைமையாசிரியா் ரெ.வெங்கடேஷ் உள்ளிட்டோா் கலந்துகொண்டனா். ஏற்பாடுகளை பண்ருட்டி நாடக நடிகா்கள் அனைத்து நாட்டுப்புறக் கலைஞா்கள் நலச் சங்க தலைவா் எஸ்.சிவநேசன், செயலா் க.குணாளன், பொருளாளா் எஸ்.சுரேஷ் ஆகியோா் செய்திருந்தனா்.

மாநாட்டில் நாட்டுப்புறக் கலைஞா்களுக்கு பயிற்சிப்பட்டறை அமைக்க வேண்டும். ஓய்வூதியமாக மாதம் ரூ.5 ஆயிரம் வழங்க வேண்டும். நாட்டுப்புறக் கலைஞா்களின் பிள்ளைகளுக்கு கல்வி உதவித் தொகையாக மாதம் ரூ.2 ஆயிரம் வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன. ஒருங்கிணைப்பாளா் ஆ.முரளி நன்றி கூறினாா்.