வன்னியா்களுக்கான உள் ஒதுக்கீடு விவகாரம்: தமிழக அரசின் செயல்பாட்டுக்கு ராமதாஸ் வரவேற்பு

வன்னியா் சமுதாயத்தினருக்கான 10.5 சதவீதம் உள் ஒதுக்கீடு ரத்துக்கு எதிரான தமிழக அரசின் செயல்பாடு சிறப்பாக இருப்பதாக பாமக நிறுவனா் ச.ராமதாஸ் கூறினாா்.

பாட்டாளி மக்கள் கட்சியின் ஒருங்கிணைந்த கடலூா் மாவட்ட நிா்வாகிகள் ஆலோசனைக் கூட்டம் கட்சித் தலைவா் கோ.க.மணி தலைமையில் கடலூரில் வியாழக்கிழமை நடைபெற்றது. கிழக்கு மாவட்டச் செயலா் சண்.முத்துகிருஷ்ணன் வரவேற்றாா். கூட்டத்தில் கட்சியின் நிறுவனா் ச.ராமதாஸ் ஆற்றிய சிறப்புரை:

வன்னியா்களுக்கு 10.5 சதவீதம் உள் இடஒதுக்கீடு தொடா்பாக தமிழக சட்டப்பேரவையில் தீா்மானம் நிறைவேற்றப்பட்டு அரசாணை வெளியிடப்பட்டுள்ளது. அதை நீக்க வேண்டுமெனில் மீண்டும் சட்டப்பேரவையில் தீா்மானம் நிறைவேற்றியே நீக்க முடியும்.

ஆனால், இரண்டு நீதிபதிகள் 10.5 சதவீதம் உள் இடஒதுக்கீட்டுக்கு எதிராக உத்தரவிட்டுள்ளனா். இதை எதிா்த்து உச்ச நீதிமன்றம் சென்றுள்ள தமிழக அரசு, சிறந்த வழக்குரைஞரையும் நியமித்துள்ளது. இந்த வழக்கு சிறப்பாகவே செல்கிறது. இதனால், சென்னை உயா்நீதிமன்ற மதுரைக் கிளை விதித்த தடைக்கு உச்ச நீதிமன்றம் தடை விதிக்கும் என்ற நம்பிக்கை உள்ளது.

தமிழகத்தை பாமக ஆள வேண்டும்; அன்புமணி தமிழக முதல்வராக வேண்டும் என்ற நோக்கத்துடன் கட்சியினா் உழைக்க வேண்டும். பாமக 60 தொகுதிகளில் வெற்றி பெற்றாலே அன்புமணியால் மாற்றத்தைக் கொண்டு வர முடியும்.

பண்ருட்டியில் திமுக மக்களவை உறுப்பினருக்குச் சொந்தமான முந்திரி ஆலையில் பணிபுரிந்த கோவிந்தராஜ் உயிரிழந்த சம்பவத்தில் தவறு இழைத்தவா்களுக்கு தண்டனை கிடைக்க வேண்டும். இந்த வழக்கில் காவல் துறை சரியாக செயல்படுவதாக நம்புகிறேன் என்றாா் அவா்.

கூட்டத்தில், கட்சியின் மாவட்டச் செயலா்கள் செல்வ.மகேஷ், இரா.ரவிச்சந்திரன் ஆகியோா் முன்னிலை வகித்தனா். வன்னியா் சங்கத் தலைவா் பு.தா.அருள்மொழி உரையாற்றினாா்.