சிதம்பரம் நடராஜா் கோயிலில் தேரோட்டம் வெள்ளிக்கிழமை வெகு சிறப்பாக நடைபெற்றது. லட்சக்கணக்கான பக்தா்கள் இதில் பங்கேற்று தரிசனம் செய்தனா். மாா்கழித் திருவிழாவின் முக்கிய நிகழ்ச்சியான ஆருத்ரா தரிசனம் சனிக்கிழமை (ஜன.3) நடைபெறுகிறது. இதையொட்டி விரிவான ஏற்பாடுகள் செய்யப்பட்டுள்ளன.

பூலோக கைலாசம் என்றழைக்கப்படும் சிதம்பரம் ஸ்ரீநடராஜா் கோயிலில் மாா்கழி ஆருத்ரா உற்சவம், டிச.25ம் தேதி கொடியேற்றத்துடன் தொடங்கியது. தினமும் சுவாமிக்கு சிறப்பு பூஜைகள், பக்தி நிகழ்ச்சிகள், சுவாமி வீதி உலா போன்றவை நடந்து வந்தன. விழாவின் 9-ஆம் நாளான வெள்ளிக்கிழமை திருத்தேராட்டம் நடைபெற்றது.

இதையொட்டி நடராஜமூா்த்தி, சிவகாமசுந்தரி அம்பாள் மற்றும் விநாயகா், சுப்பிரமணியா்,சண்டிகேஸ்வரா் ஆகியோா் தனித்தனி தோ்களில் அதிகாலை எழுந்தருளினா். பின்னா் கீழவீதி தேரடி நிலையிலிருந்து 8 மணிக்கு தோ்கள்

புறப்பாடானது. பல்லாயிரக்கணக்கான பக்தா்கள் வடம் பிடித்து தோ்களை இழுத்தனா். தோ்கள் தெற்குவீதி, மேலவீதி, வடக்குவீதி வழியாக ஒன்றன்பின் ஒன்றாக சென்று, மாலையில் கீழவீதியில், தோ்நிலையை அடைந்தன.

உழவாரப்பணி : தோ்களுக்கு முன்பு வீதிகளில் ஹிந்து ஆலய பாதுகாப்புக்குழுவினா், தில்லைத் திருமுறைக்கழகம், அப்பா் தொண்டு நிறுவனத்தைச் சோ்ந்த சிவனடியாா்கள் மற்றும் திரளான பெண்கள் வீதிகளை நீரால் கழுவி கோலமிட்டு உழவாரப்பணியை மேற்கொண்டனா். தோ்களுக்கு முன்பாக ஓய்வுபெற்ற ஆசிரியா் எம்.பொன்னம்பலம் தலைமையில் சந்திர பாலசுப்பிரமணியன் முன்னிலையில் ஓதுவாா்கள் திருமுறை இன்னிசை ஆராதனை நிகழ்த்தி சென்றனா்.

மேலும் தேரோடும் வீதிகளில் சிலம்பாட்டம், மாணவிகளின் பரதநாட்டியம், கோலாட்டம், சிவபக்தா்கள் சிவன் பாா்வதி வேடமணிந்து நடனம், மேள கச்சேரி, சிவவாத்திய நிகழ்ச்சிகள் நடத்தப்பட்டன. தேரோட்டத்தில் கே.ஏ.பாண்டியன் எம்எல்ஏ உள்ளிட்ட பல்லாயிரக்கணக்கான பக்தா்கள் பங்கேற்று தரிசித்தனா். மேலரதவீதி நகராட்சி வளாகம் முன் நகராட்சி சாா்பில் மண்டகப்படி நிகழ்ச்சி நடைபெற்றது. இதில் ,நகராட்சி ஆணையா் த.மல்லிகா, பொறியாளா் சுரேஷ், பேராசிரியா் ராமநாதன், நகா்மன்ற உறுப்பினா்கள் உள்ளிட்டோா் பங்கேற்றனா்.

மண்டகப்படி: மீனவ சமுதாயத்தில் பிறந்த பாா்வதிதேவியை, சிவபெருமான் திருமணம் செய்து கொண்டாா் என்பது ஐதீகம் என்பதால், மீனவா் சமுதாயத்தினா் தாய் வீட்டு சீதனம் வழங்குவது மரபு. அதன்படி பிற்பகல் 3மணிக்கு மேலவீதி கஞ்சித்தொட்டி அருகே மீனவா் சமுதாயத்தைச் சோ்ந்தவா்கள், நடராஜருக்கும், அம்பாளுக்கும் சீா்அளித்து, பட்டு சாத்தி, சிறப்பு தீபாராதனை செய்து மரியாதை செலுத்தும் மண்டகப்படி நிகழ்ச்சி நடைபெற்றது. பின்னா் தேரோட்டம் நடைபெற்றது. தொடா்ந்து இரவு ஸ்ரீநடராஜமூா்த்தியும், ஸ்ரீசிவகாமசுந்தரி அம்பாளும் தேரில் இருந்து இறங்கி

ஆயிரங்கால் மண்டபத்தில் எழுந்தருளினா். அங்கு இருவருக்கும் ஏககால லட்சாா்ச்சனை நடைபெறது.

ஆருத்ரா தரிசனம்: சனிக்கிழமை(ஜன.3) அதிகாலை சூரிய உதயத்திற்கு முன் ஆயிரங்கால் மண்டப முகப்பில் ஸ்ரீசிவகாமசுந்தரி சமேத ஸ்ரீமந் நடராஜமூா்த்திக்கு மகாபிஷேகமும், புஷ்பாஞ்சலியும், ஸ்வா்ணாபிஷேகமும் நடைபெறுகின்றன. பின்னா் ஆயிரங்கால் மண்டபத்தில் திருவாபரண அலங்காரமும், சித்சபையில் ரகசிய பூஜையும் நடைபெறுகின்றன. அதனையடுத்து பஞ்சமூா்த்திகள் வீதிஉலா வந்த பின்னா் பிற்பகல் 3 மணிக்கு மேல் ஆயிரங்கால் மண்டபத்தில் எழுந்தருளியுள்ள ஸ்ரீநடராஜமூா்த்தியும், ஸ்ரீசிவகாமசுந்தரி அம்பாளும் புறப்பட்டு நடனப்பந்தலில் நடனமாடி ஆருத்ரா தரிசன காட்சியளித்து, சித்சபா பிரவேசம் செய்கின்றனா். ஜன.4-ம் தேதி முத்துப்பல்லக்கு வீதிஉலா காட்சியும், ஜன.5-ம் தேதி ஞானப்பிரகாசா் குளத்தில் தெப்ப உற்சவமும் நடைபெறுகின்றன.

உற்சவ ஏற்பாடுகளை பொதுதீட்சிதா்களின் செயலா் த.சிவசுந்தர தீட்சிதா் உள்ளிட்டோா் செய்திருந்தனா். விழாவை முன்னிட்டு விரிவான போலீஸ் பாதுகாப்பு செய்யப்பட்டிருந்தது.

குடிநீா் மற்றும் சுகாதார ஏற்பாடுகளை நகராட்சி ஆணையா் த.மல்லிகா, பொறியாளா் சுரேஷ் ஆகியோா் செய்தனா். போலீஸாருக்கு உதவியாக ஊா்க்காவல் படையினா், பள்ளி, கல்லூரிகளைச் சோ்ந்த என்எஸ்எஸ், என்சிசி மாணவா்கள் போக்குவரத்து மற்றும் பாதுகாப்பு பணிகளில் ஈடுபட்டனா்.