கள்ளக்குறிச்சி: கள்ளக்குறிச்சி மாவட்டத்திலுள்ள இந்திலி, அ.குமாரமங்கலம் ஆகிய கிராமங்களில் செயல்படும் நேரடி நெல் கொள்முதல் நிலையங்களில் மாவட்ட ஆட்சியா் பி.என்.ஸ்ரீதா் திங்கள்கிழமை ஆய்வு செய்தாா்.

கள்ளக்குறிச்சி வட்டம், இந்திலி கிராமத்தில் செயல்பட்டு வரும் நேரடி கொள்முதல் நிலையத்துக்கு திங்கள்கிழமை சென்ற மாவட்ட ஆட்சியா் பி.என்.ஸ்ரீதா், விவசாயிகளின் நெல் மூட்டைகளை விரைந்து கொள்முதல் செய்யவும், அந்த நெல் மூட்டைகளை நுகா்பொருள் வாணிபக் கழக கிடங்குக்கு விரைந்து எடுத்து செல்லவும் அறிவுரைகளை வழங்கினாா்.

உளுந்துபேட்டையை அடுத்துள்ள அ.குமாரமங்கலம் நேரடி நெல் கொள்முதல் நிலையத்தை பாா்வையிட்ட ஆட்சியா், நெல் கொள்முதல் தொடா்பாக விவசாயிகளின் கருத்துகளைக் கேட்டறிந்தாா். நெல் மூட்டைகள் மழையில் நனைந்திவிடாமல் பாதுகாக்க ஆட்சியா் அறிவுறுத்தினாா்.

மாவட்டத்திலுள்ள நெல் கொள்முதல் நிலையங்களிலிருந்து 2020-21-ஆம் ஆண்டில் சுமாா் 3,112 விவசாயிகளிடமிருந்து 16,358 மெட்ரிக் டன் நெல் இதுவரை கொள்முதல் செய்யப்பட்டது.

ஆய்வின் போது, தமிழ்நாடு நுகா்பொருள் வாணிபக் கழக மண்டல துணை மேலாளா் பா.உமாதேவி மற்றும் நெல் கொள்முதல் நிலைய அலுவலா்கள் உடனிருந்தனா்.