முன்விரோதத்தில் ஒருவா் வெட்டிக் கொலை

கள்ளக்குறிச்சி: கள்ளக்குறிச்சி மாவட்டம், தியாகராஜபுரத்தில் முன்விரோத தகராறில் ஒருவா் அரிவாளால் வெட்டிக் கொலை செய்யப்பட்டாா். இதுதொடா்பாக, பக்கத்து வீட்டுக்காரரை போலீஸாா் கைது செய்தனா்.

சங்கராபுரம் வட்டம், தியாகராஜபுரத்தைச் சோ்ந்த கிருஷ்ணன் மனைவி சங்கீதா (35). இவரது பக்கத்து வீட்டில் வசித்து வருபவா் கோபால் மகன் இளையராஜா (45). இவா்கள் இருவருக்கும் இடையே முன்விரோதம் இருந்து வருகிறது.

சங்கீதாவின் பிள்ளைகள் இளையராஜா வீட்டில் உள்ள இச்சலி மரத்தின் கீழே கிடந்த பழங்களை எடுத்தபோது, அவா்களை இளையராஜா திட்டினாராம். இதைக் கண்டித்த சங்கீதாவையும் அவதூறாக பேசினாராம்.

இதைப் பாா்த்து அங்கு வந்த சங்கீதாவின் தந்தை ஆறுமுகத்தையும் (55) இளையராஜா அரிவாளால் வெட்டியதில் அவா் காயமடைந்தாா். சங்கராபுரம் அரசு மருத்துவமனைக்கு கொண்டு செல்லப்பட்ட ஆறுமுகத்தை பரிசோதித்த மருத்துவா்கள் அவா் உயிரிழந்து விட்டதாக தெரிவித்தனா்.

இதுகுறித்த புகாரின் பேரில், சங்கராபுரம் போலீஸாா் வழக்குப் பதிந்து இளையராஜா திங்கள்கிழமை கைது செய்தனா்.