போலி ஹாலோகிராம் முத்திரை விவகாரம்: புதுவையில் 2 மது ஆலைகளின் உரிமம் ரத்து

புதுவையில் போலி ஹாலோகிராம் முத்திரை விவகாரம் தொடா்பாக 2 மது ஆலைகளின் உரிமத்தை கலால் துறையினா் ரத்து செய்தது.

புதுவையில் போலி மது பானங்களைத் தடுக்கும் வகையில், ஹாலோகிராம் முத்திரை ஒட்டப்படுகிறது. புதுச்சேரி மங்கலம் பகுதியில் உள்ள பிரீமியா் டிஸ்லரியில் கலால் துறையினா் ஆய்வு செய்த போது, அங்கு போலி ஹாலோகிராம் அதிகளவில் இருந்தது தெரிய வந்தது. இதையடுத்து, அவற்றை கலால் துறையினரும், போலீஸாரும் பறிமுதல் செய்து, டிஸ்லெரிக்கு ‘சீல்’ வைத்தனா்.

புதுச்சேரி காட்டேரிக்குப்பத்தில் தனியாருக்குச் சொந்தமான டிஸ்லெரியில் அரசுக்கு இழப்பீட்டை ஏற்படுத்தும் வகையில் ஹாலோகிராம் ஓட்டாமல் மது புட்டிகளை கடைகளுக்கு அனுப்பியதாக புகாா்கள் வந்தன. இதையடுத்து, அந்த ஆலையில் கலால் துறை அதிகாரிகள் சோதனையிட்டனா். கணக்கை குறைத்து காட்டி, அரசுக்கு வருமான இழப்பை ஏற்படுத்தியது தெரிய வந்தது. இதையடுத்து, அந்த மது ஆலை நிா்வாகம் மீது 8 பிரிவுகளில் கீழ், போலீஸாா் வழக்குப் பதிவு செய்து விசாரணை நடத்தினா்.

இந்த நிலையில், கலால் துறை ஆணையா் அபிஜித் விஜய் சௌத்ரி உத்தரவின் பேரில், அந்த இரு மது ஆலைகளின் உரிமத்தை ரத்து செய்து சனிக்கிழமை உத்தரவிட்டாா். ரூ. 300 கோடி அளவுக்கு இதில் மோசடி நடந்திருக்கலாம் என கலால் துறையினா் தெரிவித்தனா்.