புதுச்சேரி மத்திய சிறையில் கைதிகளிடையே ஏற்பட்ட மோதலில் ஒருவா் காயமடைந்தாா். மேலும், கைதி ஒருவரின் அறையிலிருந்து செல்லிடப்பேசி, மின்னூட்ட கருவியை சிறை அதிகாரிகள் பறிமுதல் செய்தனா்.

புதுவை மாநிலம், காரைக்கால் பகுதியைச் சோ்ந்த பாலமுருகன் குண்டா் தடுப்புச் சட்டத்தின் கீழ் கைது செய்யப்பட்டு, புதுச்சேரி காலாப்பட்டு மத்திய சிறையில் அடைக்கப்பட்டாா். இவருடன் கஞ்சா வழக்கில் கைது செய்யப்பட்ட புதுச்சேரியைச் சோ்ந்த பிரதீப் (எ) பிரித்விராஜும் அடைக்கப்பட்டாா்.

இவா்கள் இருவரும் அடிதடி வழக்கில் கைதாகி சிறையில் அடைக்கப்பட்டுள்ள காரைக்காலைச் சோ்ந்த கைதி கலியமூா்த்தியை கிண்டல் செய்து, பாட்டுப் பாட அழைத்தனராம். இதை கலியமூா்த்தி எதிா்க்கவே, அவா்களுக்குள் வாக்குவாதம் முற்றி மோதல் ஏற்பட்டது. இதில் கலியமூா்த்தி காயமடைந்தாா்.

இதையறிந்து, அங்கு வந்த சிறை வாா்டா்கள், மோதலை தடுத்து நிறுத்தி, காயமடைந்த கலியமூா்த்தியை மீட்டு, சிகிச்சைக்காக சிறை மருத்துவமனையில் அனுமதித்தனா். தொடா்ந்து, மோதலில் ஈடுபட்ட பாலமுருகனின் அறையை சிறை அதிகாரிகள் சோதனையிட்டு, அவரது படுக்கையின் கீழிருந்த செல்லிடப்பேசி, மின்னூட்ட கருவியை பறிமுதல் செய்தனா்.

இந்த சம்பவம் குறித்து சிறைக் கண்காணிப்பாளா் கோபிநாத் அளித்த புகாரின்பேரில், காலாப்பட்டு போலீஸாா், சிறையில் கைதியை தாக்கியது தொடா்பாக பாலமுருகன், பிரதீப் ஆகிய இருவா் மீதும், செல்லிடப்பேசி வைத்திருந்தது தொடா்பாக பாலமுருகன் மீதும் என இரு வேறு வழக்குகளைப் பதிந்து விசாரித்து வருகின்றனா்.