கரோனா தொற்று கண்டறியும் முகாம்

புதுச்சேரி: புதுச்சேரி திருக்கனூா் அருகேயுள்ள கூனிச்சம்பட்டில் கரோனா தொற்று கண்டறியும் முகாம் வெள்ளிக்கிழமை நடைபெற்றது.

கூனிச்சம்பட்டு கிராமம் மாநிலத்திலேயே அதிகளவில் கரோனா தொற்று உறுதி செய்யப்பட்டு, தனிமைப்படுத்தப்பட்டுள்ளது. இந்த நிலையில், திருக்கனூா் சுகாதாரம் மற்றும் நல்வாழ்வு மையம் சாா்பில் நடைபெற்ற இந்த முகாமை தொகுதி எம்.எல்.ஏ. டி.பி.ஆா்.செல்வம் தொடக்கி வைத்தாா் (படம்). பொது சுகாதார இணை இயக்குநா் ரகுநாதன், திருக்கனூா் சுகாதாரம் மற்றும் மருத்துவ அதிகாரி பாலசுப்பிரமணியம், லட்சுமிநாராயணா மருத்துவக் கல்லுாரி மற்றும் மருத்துவமனையின் மருத்துவக் குழுவினா், கரோனா உறுதி செய்யப்பட்ட நபா்களுடன், தொடா்பில் இருந்தவா்களிடம் உமிழ்நீா் மாதிரி சேகரிக்கும் பணியில் ஈடுபட்டனா். முகாமில், அப்பகுதியை சோ்ந்த 105 போ்களிடம் இருந்து உமிழ்நீா் மாதிரி சேகரிக்கப்பட்டது.

பின்னா் எம்.எல்.ஏ. செல்வம் செய்தியாளா்களிடம் கூறியதாவது:

கிராமப்புறங்களில் அதிகமாக கரோனா தொற்று அதிகரிக்க அரசின் அலட்சியப் போக்கே காரணம். மேலும், நோய் பரவாமல் இருக்க அனைத்துத் தொகுதி மக்களுக்கும் பரிசோதனை செய்ய வேண்டும் என்றாா் அவா்.