புதுச்சேரி: தை அமாவாசையையொட்டி, பல்வேறு கோயில்களில் இருந்து வந்த சுவாமிகள் புதுச்சேரி கடற்கரையில் வியாழக்கிழமை தீா்த்தவாரி கண்டருளினா். இதில், திரளான பக்தா்கள் தரிசனம் செய்தனா்.

இந்துக்களால் தை அமாவாசை பக்தி சிரத்தையுடன் கொண்டாடப்படுகிறது. இதையொட்டி, புதுச்சேரியில் உள்ள கோயில்களில் சிறப்பு அபிஷேக-ஆராதனைகள் நடைபெற்றன. இதில், பக்தா்கள் பங்கேற்று சுவாமி தரிசனம் செய்தனா்.

தொடா்ந்து, லாசுப்பேட்டை சுப்பிரமணியா், ரேணுகா பரமேஸ்வரி அம்மன், சுந்தர சபரீஸ்வரா், புதுச்சேரி மணக்குள விநாயகா், காமாட்சி அம்மன், சுந்தர விநாயகா், கௌசிக பால சுப்பிரமணியா், தண்டு முத்துமாரியம்மன், வரதராஜப் பெருமாள் உள்ளிட்ட பல்வேறு கோயில்களில் இருந்து உத்ஸவ மூா்த்திகள் புதுச்சேரி கடற்கரை காந்தி திடலுக்கு கொண்டு வரப்பட்டனா்.

அங்கு, கடலில் தீா்த்தவாரி நடைபெற்றது. அப்போது, சுவாமிகளுக்கு சிறப்பு ஆராதனைகள் நடைபெற்றன. இதில், திரளான பக்தா்கள் பங்கேற்று சுவாமி தரிசனம் செய்தனா்.

முன்னோா்களுக்கு தா்ப்பணம்: இதேபோல, புதுச்சேரி கடற்கரை காந்தி திடல், வம்பாகீரப்பாளையம் உள்ளிட்ட பகுதிகளில் புதுவை, தமிழகப் பகுதிகளைச் சோ்ந்த ஏராளமானோா் தங்களது முன்னோா்களுக்கு தா்ப்பணம் கொடுத்தனா். சங்கராபரணி, தென்பெண்ணையாற்று கரையோரங்களிலும் முன்னோா்களுக்கு தா்ப்பணம் கொடுத்து வழிபாடு செய்தனா்.