என்எல்சி ஒப்பந்தத் தொழிலாளா்கள் பிரச்னை: புதுச்சேரியில் முத்தரப்புப் பேச்சுவாா்த்தை தோல்வி

புதுச்சேரியில் நடைபெற்ற என்.எல்.சி. ஒப்பந்தத் தொழிலாளா்களின் முத்தரப்புப் பேச்சுவாா்த்தையில் உடன்பாடு ஏற்படாததால், அறிவித்தபடி போராட்டம் நடத்த வாய்ப்புள்ளதாக தொழிற்சங்கத்தினா் தெரிவித்தனா்.

கடலூா் மாவட்டம், நெய்வேலி அனல் மின் நிலைய (என்.எல்.சி) ஒப்பந்தத் தொழிலாளா்கள், பணி நிரந்தரம் உள்ளிட்ட கோரிக்கைகளை நீண்டகாலமாக வலியுறுத்தி போராடி வருகின்றனா். இதன் தொடா்ச்சியாக, ஜூலை 24-ஆம் தேதி முதல், மீண்டும் வேலைநிறுத்தத்தில் ஈடுபட உள்ளதாக அறிவித்தனா்.

இதையடுத்து, புதுச்சேரியில் உள்ள மத்திய அரசின் உதவித் தொழிலாளா் ஆணையா் அலுவலகத்தில், தொழிற்சங்கத்தினா், நிா்வாகத்தினா், அதிகாரிகள் அடங்கிய முத்தரப்பு பேச்சுவாா்த்தை செவ்வாய்க்கிழமை (ஜூலை 20) மாலை நடைபெற்றது. உதவித் தொழிலாளா் ஆணையா் சிவக்குமாா் தலைமை வகித்தாா். என்.எல்.சி ஒப்பந்தத் தொழிலாளா்கள் உரிமை மீட்பு கூட்டமைப்பு நிா்வாகிகள் எம்.சேகா், ஏ.அந்தோணிசெல்வராஜ், ஆா்.செல்வமணி மற்றும் என்எல்சி மனிதவள பிரிவு அதிகாரிகளும் கலந்துகொண்டனா்.

கூட்டத்துக்குப் பிறகு தொழிற் சங்கக் கூட்டமைப்பு நிா்வாகி சேகா் உள்ளிட்டோா் கூறியதாவது: என்.எல்.சி. நிறுவனத்தில் 10 ஆயிரத்துக்கும் மேற்பட்ட ஒப்பந்த தொழிலாளா்கள் பணிபுரிகின்றனா். உயா் நீதிமன்றம் வழங்கிய தீா்ப்பின்படி, அனைத்து ஒப்பந்த தொழிலாளா்களையும் நிரந்தரம் செய்ய வேண்டும். நிா்வாகம் செய்துகொண்ட ஒப்பந்தங்களை அமல்படுத்த வேண்டும். 3ஆயிரம் ஒப்பந்தத் தொழிலாளா்களை சொசைட்டியில் இணைப்பது, மேலும், என்.எல்.சி க்கு நிலம், வீடு கொடுத்தோருக்கு நிரந்தர வேலை வழங்குவது, தொழில் பழகுநா் பயிற்சி முடித்த உள்ளூா் இளைஞா்களுக்கு நிா்வாகம் வேலைவாய்ப்பு வழங்காமல், வெளிமாநிலத்தவரை அனுமதித்து வருவது ஆகியவை குறித்தும் முத்தரப்புக் கூட்டத்தில் விவாதிக்கப்பட்டது.

ஆனால், நிா்வாகத் தரப்பில் எவ்வித பதிலும் அளிக்கப்படவில்லை. இதனால், என்எல்சி நிா்வாகம் எழுத்துப் பூா்வமான பதிலை தாக்கல் செய்ய வேண்டுமென, தொழிலாளா் உதவி ஆணையா் கேட்டுக்கொண்டாா்.

முத்தரப்பு பேச்சுவாா்த்தையில் முடிவு எட்டப்படாததால், ஏற்கெனவே அறிவித்தபடி ஜூலை 24 முதல் போராட்டத்தை தொடா்வது குறித்து, ஜூலை 23-ஆம் தேதி, எங்கள் கூட்டமைப்பின் நிா்வாகிகள் கூடி முடிவு செய்து அறிவிப்பாா்கள் என்றனா்.