புதுச்சேரியில் வெயில் அதிகரிப்பு காரணமாக அனைத்து பள்ளிகளுக்கும் முன்கூட்டியே விடுமுறை அறிவிக்கப்பட்டுள்ளது.

புதுச்சேரி அரசு மற்றும் தனியார்ப் பள்ளிகளுக்கு மே ஒன்றாம் தேதி முதல் கோடை விடுமுறை அறிவிக்கப்பட்ட நிலையில், தற்பொழுது வெயிலின் உக்கிரம் அதிகமாகி வருவதன் காரணமாக ஏப். 29-ஆம் தேதி முதல் கோடை விடுமுறை அளிக்கப்படுவதாக பள்ளிக்கல்வித்துறை அறிவித்துள்ளது.

வெயில் அதிகரிப்பதன் காரணமாக சுகாதாரத் துறையின் அறிவுறுத்தலின்படி முன்கூட்டியே கோடை விடுமுறை அறிவிக்கப்பட்டுள்ளது. வெள்ளிக்கிழமை இன்றுடன் பள்ளிகள் முடிகின்றன. நாளை சனி மற்றும் ஞாயிறு விடுமுறை அதனைதொடர்ந்து ஏப்ரல் 29-ஆம் தேதி முதல் கோடை விடுமுறை துவங்கும் என கல்வித்துறை உத்தரவிட்டுள்ளது.

ஜூன் 5 வரை கோடை விடுமுறை அளிக்கப்படுவதாகவும், கோடை விடுமுறை முடிந்து ஜூன் 6-ஆம் தேதி முதல் மீண்டும் பள்ளிகள் திறக்கப்படும் எனவும் பள்ளிக் கல்வித்துறை அறிவிப்பு வெளியிட்டுள்ளது.