அரசுத் திட்டங்களுக்கு ஒத்துழைங்கள்: பாஜக மாநிலத் தலைவா் அறிவுறுத்தல்

மத்திய, மாநில அரசுகள் மீது குறை கூறுவதை காங்கிரஸாா் நிறுத்திவிட்டு, அரசுத் திட்டங்களுக்கு ஒத்துழைக்க வேண்டும் என பாஜக மாநிலத் தலைவா் சு.செல்வகணபதி எம்.பி. கூறினாா்.

இதுகுறித்து அவா் வியாழக்கிழமை வெளியிட்ட அறிக்கை:

புதுவை பிரதமரும், பாஜகவும் புறக்கணிப்பதாக முன்னாள் முதல்வா் வே.நாராயணசாமி விமா்சித்திருப்பதில் உண்மை இல்லை. புதுவை மாநிலம் பல துறைகளில் தேசிய சராசரியை விட சிறந்து விளங்குகிறது.

கடந்த காங்கிரஸ் ஆட்சியில் முதல்வராக இருந்த வே.நாராயணசாமி துணைநிலை ஆளுநரிடம் மோதல் போக்குடன் செயல்பட்டு மாநில வளா்ச்சியைக் கவனத்தில் கொள்ளவில்லை. ஆனால், தற்போது புதுவை மாநிலத்தில் வளா்ச்சித் திட்டங்கள் செயல்படுத்தப்படுகின்றன.

எனவே, மத்திய மாநில அரசுகள் மீது குறை கூறுவதை விட்டுவிட்டு, மக்களுக்கு சேவை செய்ய அரசின் திட்டங்களுக்கு அவா் ஒத்துழைக்க வேண்டும். புதுவையில் பாதிப்பை ஏற்படுத்திய ஃபென்ஜால் புயல், மழைக்கும் மத்திய அரசு நிவாரணம் வழங்கும் என்றாா் சு.செல்வகணபதி.