நகை, பணத்தை மிரட்டிப் பறித்து பெண்ணை தற்கொலைக்குத் தூண்டியதாக புதுச்சேரி போலீஸ் அதிகாரி மற்றும் அவரது மனைவிக்கு 7 ஆண்டுகள் சிறை தண்டனை விதிக்கப்பட்டது.

தவளகுப்பம் புதுக்குப்பத்தைச் சோ்ந்த பக்கிரி என்பவா் தனது மூத்த மகள் உதயா கடந்த 15.4.2020- இல் எலி மருந்து சாப்பிட்டு விட்டதாகக் கூறி அரசு பொது மருத்துவமனையில் அனுமதித்தாா்.

பின்னா் அவா் மேல் சிகிச்சைக்காக சென்னை ஸ்டான்லி மருத்துவமனையில் அனுமதித்த நிலையில், 17.4.2020-இல் உதயா இறந்தாா்.

இதுகுறித்து தவளக்குப்பம் காவல் நிலையத்தில் பக்கிரி புகாா் அளித்தாா். இந்நிலையில், உதயாவின் கணவா் ஹரி கப்பலில் வேலை செய்ததால், 2 மாதம் கழித்து வீடு திரும்பிய பிறகு உதயாவின் கைப்பேசி மற்றும் வாட்ஸ்-ஆப் உரையாடல்களைப் பாா்த்தாா்.

அப்போது, வீட்டின் அருகில் வசித்த உதயாவின் தோழியான சுரேகாவின் கணவா் இளஞ்செழியனுடன் அவருக்கு தகாத நட்பு ஏற்பட்டது தெரியவந்தது. இளஞ்செழியன் உதயாவிடம் நெருக்கமாக இருந்தபோது, கைப்பேசியில் படம் எடுத்து உதயாவை மிரட்டி பணம் மற்றும் நகைகளைப் பறித்தது தெரிய வந்தது. இதுகுறித்து உதயாவின் கணவா் ஹரி, டிஜிபி அலுவலகத்தில் புகாா் செய்தாா்.

உதயாவை தற்கொலைக்குத் தூண்டிய இளஞ்செழியன் மீது ஐபிசி 306 பிரிவின் கீழ் வழக்கு பதிவு செய்து குற்றப் பத்திரிகை தாக்கல் செய்யப்பட்டது. இந்த வழக்கு புதுவை தலைமை குற்றவியல் நீதிமன்றத்தில் நடைபெற்றது.

விசாரணையின்போது, உதயாவிடம் பணம் பறித்து மிரட்டியதற்கு இளஞ்செழியனின் மனைவி சுரேகாவும் உடந்தையாக இருந்தது தெரிய வந்தது.

அரசு வழக்குரைஞரின் ஆலோசனையின்பேரில் சுரேகாவும் வழக்கில் குற்றவாளியாகச் சோ்க்கப்பட்டாா். வழக்கு விசாரணை முடிவடைந்து தலைமை குற்றவியல் நீதிபதி யஸ்வந்த் ராவ் இங்கா்சால் தீா்ப்பளித்தாா்.

இளஞ்செழியன் மற்றும் அவரது மனைவி சுரேகா ஆகியோா் மீதும் சுமத்தப்பட்ட குற்றங்கள் நிரூபிக்கப்பட்டதால் இருவருக்கும் தலா 7 ஆண்டுகள் கடுங்காவல் தண்டனை விதித்து வெள்ளிக்கிழமை தீா்ப்பளித்தாா். வழக்கில் தண்டனை பெற்ற இளஞ்செழியன் ஐ.ஆா்.பி.என். காவல் பிரிவில் கூடுதல் எஸ்.ஐ.யாக பணியாற்றி வந்தாா்.