விழுப்புரம்: புயல் நிவாரணத் தொகை வழங்கும் பணி தொடக்கம்

விழுப்புரம் மாவட்டத்தில் ஃபென்ஜால் புயலால் வாழ்வாதாரம் பாதிக்கப்பட்ட குடும்ப அட்டைதாரா்களுக்கு தலா ரூ.2 ஆயிரம் நிவாரணத் தொகை வழங்கும் பணி வியாழக்கிழமை தொடங்கப்பட்டது.

ஃபென்ஜால் புயல் தாக்கத்தால் விழுப்புரம் மாவட்டத்தில் வாழ்வாதாரம் பாதிக்கப்பட்ட குடும்ப அட்டைதாரா்களுக்கு தலா ரூ.2 ஆயிரம் நிவாரணத் தொகை, தலா 5 கிலோ அரிசி, பருப்பு, சா்க்கரை உள்ளிட்ட அத்தியாவசியப் பொருள்களை வழங்க முதல்வா் மு.க.ஸ்டாலின் உத்தரவிட்ட நிலையில், வியாழக்கிழமை காலை டோக்கன் வழங்கப்பட்டு, மாலையில் நிவாரணத் தொகையும் வழங்கும் பணி தொடங்கியது.

அதன்படி, திருவெண்ணெய்நல்லூா் ஒன்றியம் சிறுமதுரை, முகையூா் ஒன்றியம் மாரங்கியூா், மயிலம் ஒன்றியம் வீடூா் ஆகிய ஊராட்சிகளில் வியாழக்கிழமை மாலை நடைபெற்ற நிகழ்வில் மாநில வனத் துறை அமைச்சா் க.பொன்முடி பங்கேற்று, குடும்ப அட்டைதாரா்களுக்கு தலா ரூ.2 ஆயிரம் நிவாரணத் தொகை, 5 கிலோ அரிசி உள்ளிட்ட பொருள்களை வழங்கினாா்.

புயலால் குடிசை, ஓட்டுவீடுகள் பகுதியளவில் சேதமடைந்திருந்தால் ரூ.10 ஆயிரமும், முழுமையாக சேதமடைந்தால் கலைஞரின் கனவு இல்லம் திட்டத்தின் கீழ் வீடு கட்டித் தரப்படும் எனக் கூறப்பட்டிருப்பதால், பாதிக்கப்பட்டவா்கள் விண்ணப்பித்து பயன்பெறலாம். விவசாய நிலங்கள் பாதிப்பு குறித்து கணக்கீடு செய்யப்பட்டு, அதற்கும் நிவாரணத் தொகை வழங்கப்படும் என்று அமைச்சா் பொன்முடி தெரிவித்தாா்.

நிகழ்வுக்கு ஆட்சியா் சி.பழனி தலைமை வகித்தாா். மயிலம் எம்.எல்.ஏ.ச.சிவக்குமாா், முன்னாள் எம்.பி. பொன். கெளதமசிகாமணி, ஒன்றியக்குழுத் தலைவா் கு. ஓம்சிவசக்திவேல், யோகேசுவரி மணிமாறன், மாவட்டஊராட்சிக்குழு உறுப்பினா் பி.வி.ஆா்.சு. விசுவநாதன் உள்ளிட்டோா் பங்கேற்றனா்.

விழுப்புரம் தொகுதியில்: விழுப்புரம் சட்டப் பேரவைத் தொகுதிக்குள்பட்ட அய்யங்கோவில்பட்டு ஊராட்சியில் அய்யங்கோவில்பட்டு, முத்தாம்பாளையம் பகுதிகளில் பொதுமக்களுக்கு தலா ரூ.2 ஆயிரம் நிவாரணத் தொகை, அரிசி உள்ளிட்ட பொருள்களை இரா.லட்சுமணன் எம்எல்ஏ வழங்கினாா்.

நிகழ்வில் கோலியனூா் ஒன்றியக் குழுத் தலைவா் இ.சச்சிதாநந்தம், துணைத் தலைவா் உதயகுமாா், ஒன்றியச் செயலா் மும்மூா்த்தி, துணைச் செயலா் ஜெயா பன்னீா்செல்வம், நகா்மன்ற உறுப்பினா் ஆா்.மணவாளன் உள்ளிட்டோா் பங்கேற்றனா்.

இதுபோன்று, பிற தொகுதிகளிலும் நிவாரண உதவித்தொகை வழங்கும் பணி வியாழக்கிழமை தொடங்கப்பட்டதாக மாவட்ட நிா்வாகம் அறிவித்துள்ளது.