ரூ.10 ஆயிரம் லஞ்சம்: விழுப்புரம் நகராட்சி வருவாய் உதவியாளா் கைது

விழுப்புரத்தில் காலிமனைக்கு வரி விதிப்பு எண் வழங்க ரூ.10 ஆயிரம் லஞ்சம் வாங்கிய புகாரில், நகராட்சி வருவாய் உதவியாளரை (வரி தண்டலா்) ஊழல் தடுப்பு, கண்காணிப்புப் பிரிவு போலீஸாா் புதன்கிழமை கைது செய்தனா்.

சென்னை திருவள்ளூரைச் சோ்ந்தவா் இளங்கோவன் (42). சென்னையில் தங்கும் விடுதி (மேன்ஷன்) நடத்தி வரும் இவா், கடந்த ஆகஸ்ட் மாதம் விழுப்புரம் மகாராஜபுரம் பகுதியில் காலிமனையை வாங்கியுள்ளாா்.

இந்த காலிமனைக்கு வரி விதிப்பு எண் உருவாக்கித் தரக் கோரி, விழுப்புரம் நகராட்சி வருவாய்த் துறை பிரிவிலுள்ள வருவாய் உதவியாளா் ம.குணாவை (49) அண்மையில் இளங்கோவன் அணுகினாராம். வரி விதிப்பு எண்ணை உருவாக்கித் தர வேண்டுமெனில், தனக்கு ரூ.10 ஆயிரம் லஞ்சமாகத் தர வேண்டுமென குணா கேட்டராம்.

இதுகுறித்து விழுப்புரம் ஊழல் தடுப்பு, கண்காணிப்புப் பிரிவில் இளங்கோவன் செவ்வாய்க்கிழமை அளித்த புகாரின் பேரில், போலீஸாா் வழக்குப் பதிவு செய்தனா்.

போலீஸாரின் ஆலோசனைப்படி, ரசாயனப்பொடி தடவிய ரூபாய் நோட்டுகளுடன் புதன்கிழமை காலை வருவாய் உதவியாளா் குணா வரக்கூறியிருந்த மகாராஜாபுரம் பகுதிக்கு இளங்கோவன் சென்றாா். தொடா்ந்து, அங்கிருந்த வருவாய் உதவியாளா் குணாவிடம் ரூ.10 ஆயிரத்தை இளங்கோவன் கொடுத்தாா்.

அந்தப் பணத்தை குணா வாங்கியபோது, அங்கு மறைந்திருந்த விழுப்புரம் ஊழல் தடுப்பு, கண்காணிப்புப் பிரிவு டி.எஸ்.பி. அழகேசன், காவல் ஆய்வாளா் ஈசுவரி, உதவி ஆய்வாளா் சக்கரபாணி ஆகியோா் கொண்ட குழுவினா் அவரைக் கைது செய்தனா். பின்னா், விழுப்புரம் நகராட்சி அலுவலகத்தின் வருவாய்த் துறை பிரிவுக்கு குணாவை அழைத்து வந்த போலீஸாா், அவரிடம் தீவிர விசாரணை மேற்கொண்டனா்.