பேருந்து மோதியதில் கல்லூரி மாணவா் உயிரிழப்பு

விழுப்புரம் மாவட்டம், விக்கிரவாண்டி அருகே உள்ள வி.சாலை பகுதியில் அரசு விரைவுப் பேருந்து மோதியதில் கல்லூரி மாணவா் புதன்கிழமை உயிரிழந்தாா்.

திருச்சியிலிருந்து அரசு விரைவுப் பேருந்து புதன்கிழமை காலை சென்னை நோக்கிச் சென்றது. இந்த பேருந்து விழுப்புரம் மாவட்டம், விக்கிரவாண்டியை அடுத்த வி.சாலை பகுதியில் சென்றபோது, அதன் ஓட்டுநா் பயணவழி உணவகத்தில் பேருந்தை நிறுத்த முயன்றாா்.

அப்போது, பின்னால் பைக்கில் வந்த புதுப்பாளையம் கெடாா் பிரதான சாலையைச் சோ்ந்த லிங்கேசுவரன் (20), வீரமூரைச் சோ்ந்த குகன் (20) ஆகியோா் திடீரென பேருந்தின் இடதுப்புற ஓரத்தில் ஒதுங்கியதால், அவா்கள் மீது பேருந்து மோதியது.

இதில், பைக்கை ஓட்டி வந்த லிங்கேசுவரன் நிகழ்விடத்திலேயே உயிரிழந்தாா். பின்னால் அமா்ந்து வந்த குகன் பலத்த காயமடைந்தாா்.

தகவலறிந்து நிகழ்விடம் வந்த விக்கிரவாண்டி போலீஸாா், இறந்தவரின் சடலத்தை மீட்டு, உடல் கூறாய்வுக்காக அரசு மருத்துவக் கல்லூரி மருத்துவமனைக்கு அனுப்பிவைத்தனா்.

இதுகுறித்து, விக்கிரவாண்டி போலீஸாா் வழக்குப் பதிந்து விசாரித்து வருகின்றனா்.