அதிமுகவுக்கு மாற்று திமுக இல்லை: ராமதாஸ்

அதிமுகவுக்கு மாற்றாக திமுக இருக்க முடியாது என்று பாமக நிறுவனர் ராமதாஸ் கூறியுள்ளார்.

 இது தொடர்பாக வியாழக்கிழமை அவர் வெளியிட்ட அறிக்கை:-

 தமிழக சட்டப்பேரவைத் தேர்தலுக்கான வேட்பு மனுத் தாக்கல் தொடங்க இன்னும் 22 நாள்களே உள்ள நிலையில் அதற்கான களப்பணிகளில் பாமக தீவிரமாக ஈடுபட்டிருக்கிறது. தேர்தலில் வெற்றிகளைக் குவிக்க வேண்டும் என்ற எண்ணம் கொண்ட அனைவரின் கவனமும் களப் பணிகளில் தான் இருக்க வேண்டும்.

 ஆனால், கருணாநிதியோ கள நிலவரம் புரியாமல் அதிமுகவுக்கு மாற்று திமுகதான் என்று தமக்குத்தாமே ஆறுதல் கூறிக் கொண்டிருக்கிறார்.

 ஒரு தேர்தலில் தமது கட்சிதான் வெற்றி பெறும் என்று கூறுவதற்கான அனைத்து உரிமைகளும் அக்கட்சித் தலைவருக்கு உண்டு.   ஆனால், பாமகவுக்கு பரவலான பலம் இல்லை. அதிமுக மாற்று திமுக மட்டுமே மாற்று என்று பெருமிதமாக கூறியுள்ளார்.

 அதிமுகவுக்கு திமுக எந்த வகையில் மாற்றாக இருக்க முடியாது. அதிமுகவும் திமுகவும் ஒரே குட்டையில் ஊறிய மட்டைகள் என்று காமராஜர் கூறினார்.

 தமிழகம் இப்போது எதிர்கொண்டு வரும் பிரச்னைகளுக்கான தீர்வு திமுகவிடம் இல்லை. மதுவுக்கு எதிராக 35 ஆண்டுகளாக நான் நடத்தி வரும் போராட்டம் காரணமாக மக்களிடம் எழுச்சி ஏற்பட்டது. இதைப் பயன்படுத்திக் கொள்ள வேண்டும் என்பதற்காக, தமிழகத்தில் மது ஆறாக ஓட தாம்தான் காரணம் என்பதையெல்லாம் மறந்து விட்டு திமுக ஆட்சிக்கு வந்தால் மதுவிலக்கு அமல் படுத்தப்படும் என்று திமுக கூறுகிறது. இது சந்தர்ப்பவாதம்.

 ஊழலில் ஊற்றுக்கண்ணான தி.மு.க.வால் ஊழலை ஒழிக்க முடியாது.  தெளிவாக கூற வேண்டுமானால் திமுகவுக்கும், அதிமுகவுக்கும் இடையே தான் போட்டி என்று கருணாநிதி கூறியிருப்பது ஒரு நயவஞ்சகத் திட்டம் ஆகும்.

அதிமுக, திமுக ஆகிய இரு கட்சிகளையுமே ஆட்சிக்கு வர அனுமதிக்கக்கூடாது என்பது தான் மக்களின் விருப்பம்.  இந்த இரு கட்சிகளுக்கும் மாற்று தேவை என மக்கள் எதிர்பார்க்கின்றனர். அந்த மாற்றுதான் பாமக என்று அவர் கூறியுள்ளார்.