ரிலையன்ஸ் இண்டஸ்ட்ரீஸ் மூன்றாம் காலாண்டில் நிகர லாபமாக ரூ. 7,506 கோடி ஈட்டியதாகத் தெரிவித்துள்ளது.
மும்பை பங்குச் சந்தைக்கு அந்நிறுவனம் அளித்த அறிக்கையில் தெரிவித்திருப்பதாவது: அக்டோபர் முதல் டிசம்பர் வரையிலான மூன்றாம் காலாண்டில் நிறுவனத்தின் மொத்த வருவாய் ரூ. 84,189 கோடியாக இருந்தது. கடந்த ஆண்டு இதே கால அளவில் பெற்ற வருவாயைவிட இது 16 சதவீதம் கூடுதலாகும். நிகர லாபம் கடந்த ஆண்டு நிலையைவிட 3.6 சதவீதம் வளர்ச்சி பெற்று, ரூ. 7,506 கோடியை நிறுவனம் ஈட்டியது.
ரிலையன்ஸ் ரீடெயில் பிரிவின் வருவாய் கடந்த ஆண்டைவிட 47 சதவீதம் அதிகரித்து ரூ. 8,688 கோடியாக இருந்தது. வரி, வட்டிக்கு முந்தைய லாபம் 40 சதவீதம் வளர்ச்சி பெற்று ரூ. 333 கோடியாக இருந்தது. மூன்றாம் காலாண்டில் ரிலையன்ஸ் ரீடெயில் பிரிவின் கீழ் 111 புதிய விற்பனையகங்கள் திறக்கப்பட்டன. தற்போது நாடு முழுவதும் 686 நகரங்களில் உள்ள ரிலையன்ஸ் ஃபிரெஷ், ரிலையன்ஸ் சூப்பர், ரிலையன்ஸ் ஹைப்பர், ரிலையன்ஸ் டிஜிட்டல், டிரெண்ட்ஸ் உள்ளிட்ட அங்காடிகளின் மொத்த எண்ணிக்கை 3,533 ஆகும் என்று அந்த அறிக்கையில் குறிப்பிடப்பட்டுள்ளது.