டாடா குழுமத்தைச் சேர்ந்த நாட்டின் மூன்றாவது மிகப்பெரிய மென்பொருள் ஏற்றுமதி நிறுவனமான டிசிஎஸ் நான்காவது காலாண்டில் ரூ.6,904 கோடி லாபம் ஈட்டியது. 
இதுகுறித்து அந்த நிறுவனம் மும்பை பங்குச் சந்தைக்கு வியாழக்கிழமை அளித்துள்ள அறிக்கையில் தெரிவித்துள்ளதாவது:
டிசிஎஸ் நிறுவனத்தின் வருவாய் சென்ற நிதி ஆண்டின் நான்காவது காலாண்டில் ரூ.32,075 கோடியாக இருந்தது. 2016-17 நிதி ஆண்டில் இதே கால அளவில் ஈட்டிய வருவாய் ரூ.29,642 கோடியுடன் ஒப்பிடுகையில் இது 8.2 சதவீதம் அதிகம்.
நிகர லாபம் ரூ.6,608 கோடியிலிருந்து 4.4 சதவீதம் அதிகரித்து ரூ,.6,904 கோடியானது. 
கடந்த 2017-18 முழு நிதி ஆண்டில் வருவாய் 4.2 சதவீதம் உயர்ந்து ரூ.1.23 லட்சம் கோடியாக இருந்தது. அதேசமயம், நிகர லாபம் 1.7 சதவீதம் குறைந்து ரூ25,826 கோடியானது. 
மார்ச் மாத இறுதி நிலவரப்படி நிறுவனத்தின் மொத்த பணியாளர்கள் எண்ணிக்கை 3,94,998-ஆக இருந்தது. சென்ற நிதி ஆண்டுக்கு 1:1 என்ற விகிதத்தில் போனஸ் பங்குகளை வழங்க இயக்குநர்கள் குழு பரிந்துரைத்துள்ளதாக டிசிஎஸ் நிறுவனம் அந்த அறிக்கையில் தெரிவித்துள்ளது.