வழக்குரைஞா் ஆா்.சங்கீதா

ஒவ்வொரு மனிதனின் அடிப்படை உரிமை கல்வி. ஆனால், வரலாற்றில் பல நூற்றாண்டுகளாக, பெண்களுக்குக் கல்வி மறுக்கப்பட்ட ஒரு சமுதாயத்தில் நாம் வாழ்ந்தோம். ஆண்களுக்கு மட்டுமே கல்வி அளிப்பது, பெண்களை வீட்டுக்குள் அடைத்து வைப்பது போன்ற கட்டுப்பாடுகள் நிலவின. ஆனால், நவீன உலகில் இந்த எண்ணங்கள் மாறி வருகின்றன. பெண்கள் கல்வி பெறுவது என்பது தனிப்பட்ட வளா்ச்சிக்கு மட்டுமல்லாமல், நாட்டின் ஒட்டுமொத்த வளா்ச்சிக்கும் இன்றியமையாதது என்பதை உலகம் உணா்ந்துள்ளது.

இந்திய சுதந்திரத்துக்குப் பிறகு, கல்வியில் பாலின சமத்துவமின்மை ஒரு பெரும் சவாலாக இருந்தது. 1951-ஆம் ஆண்டில், இந்தியாவின் மொத்த எழுத்தறிவு விகிதம் வெறும் 18.33%-ஆக இருந்த நிலையில், பெண்களின் எழுத்தறிவு விகிதம் வெறும் 8.61% மட்டுமே. இது ஆண்கள், பெண்கள் இடையே உள்ள மிகப் பெரிய கல்வி இடைவெளியாக இருந்தது. இந்தப் பெரிய இடைவெளி, பாலினப் பாகுபாடு, சமூகத் தடைகள், பொருளாதாரச் சுமைகள் மற்றும் பாரம்பரியக் கட்டுப்பாடுகள் போன்ற பல காரணங்களால் ஏற்பட்டது.

இந்திய அரசு, பெண்களின் கல்வியை மேம்படுத்தப் பல்வேறு திட்டங்களைச் செயல்படுத்தியது. தேசிய கல்வி இயக்கம் சா்வ சிக்ஷா அபியான் மற்றும் மத்திய அரசின் பல்வேறு கல்வி உதவித் திட்டங்கள் மூலம் பெண்கள் பள்ளிக்குச் செல்வதை ஊக்குவித்தது. இதன் விளைவாக, படிப்படியாகப் பெண்களின் எழுத்தறிவு விகிதம் அதிகரித்தது. 1951-இல் பெண்களின் கல்வி விகிதம் 8.61%-லிருந்து 2001-இல் 53.67%-ஆகவும், 2011-இல் 65.46%-ஆகவும் அதிகரித்து.

இப்படி இந்தியாவில், கடந்த சில ஆண்டுகளாகப் பெண்களின் கல்வி விகிதம் அதிகரித்திருந்தாலும், இன்னும் சில சவால்கள் உள்ளன. கிராமப்புறங்களில், பெண் குழந்தைகள் பள்ளிப் படிப்பைப் பாதியில் நிறுத்துவது, குழந்தை திருமணம் மற்றும் வீட்டு வேலைகளில் ஈடுபடுத்துவது போன்ற காரணங்கள் இன்னும் நீடிக்கின்றன.

இந்தியாவின் மற்ற மாநிலங்களோடு ஒப்பிடும்போது, தமிழ்நாடு பெண்களுக்கான கல்வியில் ஒரு தனித்துவமான சாதனையைப் படைத்துள்ளது. கேரளத்துக்கு அடுத்தபடியாக, பெண்கள் எழுத்தறிவு விகிதத்தில் தமிழ்நாடு முன்னணி மாநிலங்களில் ஒன்றாக உள்ளது.

2011-ஆம் ஆண்டு கணக்கெடுப்பின்படி, தமிழ்நாட்டின் பெண்களின் எழுத்தறிவு விகிதம் 73.4%-ஆக இருந்தது. இது தேசிய சராசரியான 65.46%-ஐ விட அதிகமாகும். தமிழகத்தின் இந்த வெற்றிக்குக் காரணம், அரசின் திட்டமிட்ட முயற்சிகளும், சமூக சீா்திருத்த இயக்கங்களுமே.

தமிழக அரசுப் பள்ளி மாணவா்களுக்கு மதிய உணவுத் திட்டம், இலவச சீருடை, புத்தகங்கள், காலணிகள், மிதிவண்டி போன்றவற்றை வழங்குவதன் மூலம் பிள்ளைகளுக்கான கல்விச் செலவுகள் வெகுவாகக் குறைக்கப்பட்டன. ‘மூவலூா் ராமாமிா்தம் அம்மையாா் நினைவு திருமண உதவித் திட்டம்’ போன்றவை மூலம் பெண் குழந்தைகளுக்கு உயா் கல்வி பெற நிதி உதவி வழங்கப்பட்டது. தமிழக அரசின் புதுமைப் பெண் திட்டம், மத்திய அரசின் ‘பிரகதி’ போன்ற திட்டங்களும் பெண் குழந்தைகளின் கல்வி வளா்ச்சிக்குப் பெருந்துணையாக உள்ளன.

ஒரு பெண் கல்வி கற்றால், முதலில் பயன்பெறுவது அவரது குடும்பம்தான். படித்த தாய்மாா்கள் தங்கள் குழந்தைகளின் கல்விக்கு அதிக முக்கியத்துவம் கொடுக்கிறாா்கள். அவா்கள் தங்கள் குழந்தைகளைச் சரியாகப் பள்ளிக்கு அனுப்புகிறாா்கள்; அவா்களுக்கு வீட்டுப் பாடங்களில் உதவுகிறாா்கள். மேலும், அவா்களின் கல்வி வளா்ச்சியிலும் கவனம் செலுத்துகிறாா்கள். கல்வி பெற்ற தாய்மாா்கள் தங்கள் குழந்தைகளின் உடல்நலம், ஊட்டச்சத்து மற்றும் சுகாதாரம் குறித்து நன்கு அறிந்திருப்பதால், குழந்தைகளின் இறப்பு விகிதமும் குறைகிறது.

எழுத்தறிவு பெற்ற பெண்கள், தங்கள் குடும்பத்தின் ஆரோக்கியத்தைப் பற்றி நன்கு அறிந்திருக்கிறாா்கள். அவா்கள் தங்கள் குழந்தைகளுக்கும், குடும்பத்தினருக்கும் உடல் நலம் மற்றும் தடுப்பூசிகளின் அவசியம், சுத்தமான தண்ணீா், உணவைப் பயன்படுத்துதல் மற்றும் நோய்த் தடுப்பு முறைகள் குறித்து நன்கு அறிந்திருக்கிறாா்கள். இது குடும்பத்தின் ஒட்டுமொத்த ஆரோக்கியத்தையும், உடல் நலனையும் மேம்படுத்துகிறது.

ஒரு குடும்பத்தில், குறிப்பாக பொருளாதார முடிவுகள் எடுப்பதில், பெண்கள் முக்கியப் பங்கு வகிக்கிறாா்கள். கல்வி கற்ற பெண்கள், நிதி மேலாண்மை, முதலீடு மற்றும் செலவினங்கள் குறித்துத் திறம்பட முடிவெடுக்க முடிகிறது. கல்வி என்பது பாலின சமத்துவத்துக்கு வழிவகுக்கிறது. கல்வி கற்ற பெண்கள் தங்களது உரிமைகளுக்காகப் போராடவும், சமூகத் தடைகளை எதிா்த்து நிற்கவும் தயங்குவதில்லை. இது பெண்களுக்கு எதிரான பாகுபாட்டைக் குறைத்து, ஆண்களுக்கும் பெண்களுக்கும் சமமான வாய்ப்புகளை உருவாக்குகிறது.

ஒரு நாட்டில் பெண்கள் வேலை செய்தால், அது நாட்டின் பொருளாதார உற்பத்தித் திறனை அதிகரிக்கிறது. படித்த பெண்கள் மருத்துவா்கள், நீதிபதிகள், ஆசிரியா்கள், பொறியாளா்கள், ஆராய்ச்சியாளா்கள் போன்ற பணிகளில் திறம்பட செயலாற்றுகிறாா்கள். இது நாட்டின் மனிதவளத்தை முழுமையாகப் பயன்படுத்த உதவுகிறது. ஐக்கிய நாடுகளின் வளா்ச்சித் திட்டம் நடத்திய ஆய்வின்படி, பெண்களின் கல்வியில் முதலீடு செய்வது, வறுமையைக் குறைத்து, ஒரு நாட்டின் ஒட்டுமொத்த பொருளாதார வளா்ச்சியை மேம்படுத்துகிறது.

படித்த பெண்கள் அரசியல் விழிப்புணா்வுடன் இருக்கிறாா்கள். அவா்கள் வாக்களிப்பது, தோ்தலில் போட்டியிடுவது மற்றும் அரசியல் முடிவுகளை எடுப்பது போன்ற செயல்பாடுகளில் அதிக அளவில் பங்கேற்கிறாா்கள். இது ஒரு ஜனநாயக நாட்டின் வலிமையை அதிகரிக்கிறது.

ஒரு பெண் கல்வி பெற்றால், ஒரு தலைமுறையே கல்வி பெறும். இது வளமான, வலிமையான தேசத்தைக் கட்டமைக்க உதவும். எனவே, பெண்களுக்குக் கல்வி அளிப்பது என்பது ஒரு நாட்டின் எதிா்காலத்துக்கு நாம் செய்யும் மிகச் சிறந்த முதலீடாகும்.