முதல் நாளிலேயே வெற்றியைக் கொண்டாடிய போகன் படக்குழு! (படங்கள் & வீடியோ)

அடுத்தடுத்து படங்களை தயாரிப்பதன் மூலம், தயாரிப்பாளராகவும் கவனம் பெறுகிறார் பிரபுதேவா. சமீபத்தில் நடித்து, தயாரித்து வெளியிட்ட "தேவி' வசூல் ரீதியாக பெரும் வெற்றியைப் பெற்றது. குறைந்த பட்ஜெட்டில் உருவான இப்படம், தமிழ், தெலுங்கு, ஹிந்தி ஆகிய மொழிகளில் வெற்றி வாகை சூடியது. இதையடுத்து பிரபுதேவா தயாரித்துள்ள படம் "போகன்.' "ரோமியோ ஜூலியட்' படத்தைத் தொடர்ந்து இயக்குநர் லஷ்மண், ஜெயம் ரவி, ஹன்சிகா கூட்டணி இப்படத்திலும் இணைந்துள்ளது. "தனி ஒருவன்' படத்தைத் தொடர்ந்து ஜெயம் ரவியுடன் இணைந்து நடித்துள்ளார் அரவிந்த் சாமி.

போகன் படம் நேற்று வெளியானது. முதல் நாளன்றே இதன் வெற்றிவிழாக் கொண்டாட்டம் சென்னை கமலா திரையரங்கில் ரசிகர்கள் முன்னிலையில் கொண்டாடப்பட்டது. திரையின் முன்பு படக்குழுவுடன் இணைந்து கேக் வெட்டினார் ஜெயம் ரவி. பிறகு படம் பார்க்க வந்த ரசிகர்களுடன் இணைந்து செல்ஃபி புகைப்படம் எடுத்துக்கொண்டார்.