3 கோடியைக் கடந்த பிக் பாஸ் பார்வையாளர்கள்: கமல், விஜய் டிவி மகிழ்ச்சி!

சர்வதேச அளவில் மிகவும் பிரசித்தி பெற்ற நிகழ்ச்சி - பிக் பாஸ். தற்பொழுது இந்நிகழ்ச்சியை விஜய் தொலைக்காட்சியில் நடிகர் கமல்ஹாசன் தொகுத்து வழங்குகிறார். சமீபத்தில் இந்த நிகழ்ச்சி ஆரம்பமானது. இந்த நிகழ்ச்சியின் மூலம் நடிகர் கமல்ஹாசன் முதன் முறையாக தொலைக்காட்சியில் அடியெடுத்து வைத்துள்ளார். 

திங்கள் முதல் வெள்ளி வரை இரவு 9 மணிக்கும், சனி மற்றும் ஞாயிற்றுக்கிழமைகளில் 8.30 மணிக்கும் ஒளிபரப்பாகிறது.

கடந்த இரண்டு வாரங்களாகச் சமூகவலைத்தளங்களில் பிக் பாஸ் குறித்த விவாதங்கள் அதிகமாக உள்ளன. இதனால் அந்த நிகழ்ச்சிக்குப் பார்வையாளர்களின் எண்ணிக்கை நாளுக்கு நாள் அதிகரித்துவருகிறது. இதுகுறித்த ட்வீட் ஒன்றை விஜய் டிவி வெளியிட்டுள்ளது. அதில் கூறியுள்ளதாவது:

கமல் மற்றும் தமிழ்நாட்டு மக்களுக்கு நன்றி. பிக் பாஸ் அற்புதமாகத் தொடங்கியுள்ளது. 3 கோடியே 60 லட்சம் பார்வையாளர்களைப் பெற்றுள்ளது. நன்றி மக்களே என்று கூறியுள்ளது.

இதற்குப் பதிலளித்துள்ள கமல், என் வேலையைச் சுலபமாக்கிய விஜய் டிவிக்கு நன்றி. இந்த நிகழ்ச்சியைப் பார்த்த 3.60 கோடி பார்வையாளர்கள்தான் பிக் பாஸ். அனைவருக்கும் நன்றி என்று அவரும் தன் மகிழ்ச்சியை வெளிப்படுத்தியுள்ளார்.