அடுத்தடுத்து படங்கள் இயக்கும் சீனு ராமசாமி: புதிய பட அறிவிப்பு!

விஜய் சேதுபதி நடிப்பில் மாமனிதன் படத்தை இயக்கியுள்ள இயக்குநர் சீனு ராமசாமி அடுத்ததாக அருள்நிதி நடிக்கும் படத்தை இயக்கவுள்ளார்.

இதற்கான அறிவிப்பு இன்று வெளியாகியுள்ளது. இந்தப் படத்துக்கு யுவன் சங்கர் ராஜா இசையமைக்கிறார். இதன்மூலம் அடுத்தடுத்து படங்களை இயக்கி வருகிறார் சீனு ராமசாமி.

2016-ல் விஜய் சேதுபதி நடித்த தர்மதுரை வெளிவந்தது. அதன்பிறகு 3 வருடங்கள் கழித்துதான் சீனு ராமசாமி இயக்கிய படம் வெளிவந்தது. உதயநிதி ஸ்டாலின் நடித்த கண்ணே கலைமானே. இந்தப் படம் வெளிவருவதற்கு முன்பே தனது அடுத்தப் படமான மாமனிதன் படப்பிடிப்பை பிப்ரவரி மாதத்தில் முடித்துவிட்டார் சீனு ராமசாமி. இந்நிலையில் இவருடைய அடுத்தப் படம் அறிவிப்பும் தற்போது வெளியாகியுள்ளது. இதோடு, விஜய் சேதுபதி நடிப்பில் சீனு ராமசாமி இயக்கியுள்ள இடம் பொருள் ஏவல் படம் பல வருடங்களாக வெளியிடப்படாமல் உள்ளது. இதனால் இந்த வருடம் சீனு ராமசாமி இயக்கத்தில் நான்கு படங்கள் (கண்ணே கலைமானே, மாமனிதன், இடம் பொருள் ஏவல், அருள்நிதி நடிக்கும் படம்) வெளியானாலும் ஆச்சர்யப்படுவதற்கில்லை!