இயக்குநர் ராஜ் கபூரின் மகன் உடல்நலக் குறைவால் மரணமடைந்துள்ளார். அவருக்கு வயது 23.

தாலாட்டு கேக்குதம்மா படத்தின் மூலம் இயக்குநரான அறிமுகமான ராஜ் கபூர் - அவள் வருவாளா, ஆனந்த பூங்காற்றே, உத்தமராசா, சமஸ்தானம் போன்ற படங்களை இயக்கியதோடு பல படங்களில் குணச்சித்திர வேடங்களிலும் நடித்துள்ளார். 

ராஜ் கபூருக்கு ஷஜீலா கபூர் என்கிற மனைவியும் ஷாருக் கபூர் என்கிற மகனும் ஷமீமா கபூர், ஷானியா கபூர் என்கிற இரு மகள்களும் உள்ளார்கள். 23 வயதான ஷாருக் கபூருக்குக் கடந்த வருடம் உடல்நலக் குறைவு ஏற்பட்டது. குணமான பிறகு மெக்காவுக்குப் புனிதப் பயணம் செல்ல திட்டமிட்டது ராஜ் கபூரின் குடும்பம். 

இந்நிலையில் தனது தாயுடன் மெக்காவுக்குச் சென்றபோது ஷாருக் கபூருக்கு மூச்சுத்திணறல் ஏற்பட்டு மரணமடைந்துள்ளார். இயக்குநர் ராஜ் கபூரின் மகன் இளம் வயதிலேயே மரணமடைந்தது தமிழ்த் திரையுலகை அதிர்ச்சியடைய வைத்துள்ளது.