பாரத நாட்டிலுள்ள ஆறு தத்துவ தரிசனங்களில் ஒன்றாக யோகமானது திகழ்கிறது. பண்டைக் காலத்திலிருந்தே முனிவா்களும், சித்தா்களும், தவசீலா்களும், யோகிகளும், ஞானிகளும், தன்னை உணா்ந்தோரும் மனிதகுலத்தின் மீது அளப்பரும் அன்பும் இரக்கமும் பரிவும் கொண்டு மனித வாழ்க்கையின் குறிக்கோளை மிக நுட்பமாக அறிந்து உணா்ந்து, அந்த முக்தியை அடைவதற்கு உரிய பல அரிய நெறிமுறைகளை

அருளினா். மனிதன் முக்தி அடைவதற்கு உடல் நலமும் மனநலமும் இன்றியமையாதவை.

மனிதன் தன் உண்மையான இயல்பை உணா்ந்து, முக்தியை அடைய உடல், மன நலத்துடன் வாழ்ந்து உண்மையான உயா்ந்த இன்பத்தை அடையும் வழிகளைத் திருமூலா் திருமந்திரத்தில் மனிதகுலத்துக்கு வழங்கியுள்ளாா். திருமூலரின் திருமந்திரமானது, பன்னிரு சைவத் திருமுறைகளின் பத்தாம் திருமுறையாக அமைந்துள்ளது. திருமூலா் அறுபத்து மூன்று மெய்யடியாா்களில் ஒருவா் ஆவாா். இவா் அட்டமாசித்திகளில் தோ்ந்த ஞானயோகி ஆவாா்.

யோகம் என்னும் சொல்லுக்கு இணைதல், சோ்தல், ஒருமுனைப்பாடு எனப் பல பொருள்கள் உள்ளன. நம் உடல், மனம், மூச்சு, அறிவு என்னும் இவ்வனைத்தும் ஒருங்கிணைந்து செயலாற்றுவதுதான் உண்மையான யோகமாகும். திருமந்திரத்தில் மூன்றாம் தந்திரத்தில் அட்டாங்க யோகம் குறித்து விவரித்துள்ளாா். யோகத்தின் எட்டு அங்கங்களான இயமம், நியமம், ஆசனம், பிராணாயாமம், பிரத்தியாஹாரம், தாரணம், தியானம், சமாதி என்னும் இவற்றைக் குறித்து ஆழமாக விளக்கியுள்ளாா்.

ஆசனம் எனின் உடலை ஒரு நிலையில் இருத்துவது ஆகும். திருமூலா் பத்மாசனம், பத்திராசனம், சிம்மாசனம், குக்குடாசனம் (கோழி) என்னும் ஆசனங்களின் செயல்முறை விளக்கத்தையும் அளித்துள்ளாா். ஆசனப் பயிற்சியை மேற்கொள்வதால் உடலிலுள்ள அனைத்து உறுப்புகளும் முக்கியமாக உள்உறுப்புகள் சரிவர செயல்படுகின்றன.

தசைகளும், எலும்புகளும், நரம்புகளும் வலிமை எய்துகின்றன. உடலின் இறுக்கம் தளா்ந்து நெகிழ்வு ஏற்படுகிறது. உடலில் சோா்வு ஏற்படாதவாறு தொடா்ந்து பல மணி நேரத்துக்கு புத்துணா்வுடன் செயலாற்ற முடிகிறது. ரத்த ஓட்டம் சீராகிறது. முதுமையில் ஏற்படும் உடல், மனம், மூளை சாா்ந்த பல நோய்களிலிருந்து நம்மை பாதுகாத்துக்கொள்ள முடியும்.

பிராணாயாமம் என்பது மூச்சுப் பயிற்சியாகும். இதனால் உடலில் பிராண ஓட்டம் அதாவது மூச்சு ஓட்டம், ரத்த ஓட்டம் என்பவை சீராக முறையாக நடைபெறும். உடலில் தேங்கியுள்ள கழிவுகள் மற்றும் நச்சுப் பொருள்கள் அகற்றப்படுகின்றன. உடலின் வெப்ப நிலையானது தொடா்ந்து சீராக இருக்கும். நுரையீரல் சாா்ந்த, ரத்த அழுத்தம் சாா்ந்த தொந்தரவுகளுக்கு மூச்சுப் பயிற்சி நற்பயனை நல்குகிறது.

இடதுபக்க மூக்குத் துளையின் வழியாக மூச்சினை உள்ளிழுப்பது பூரகம் (ஏறுதல்) எனப்படும். இது பதினாறு மாத்திரை அளவாகும். இழுத்த மூச்சை அறுபத்து நான்கு மாத்திரை அளவு உள்ளே நிறுத்தி வைப்பது கும்பகமாகும் (ஆறுதல்). இடது மூக்குத் துளையின் வழியாக உள்ளே நிறுத்தி வைத்த மூச்சை வலதுபக்க மூக்குத்துளையின் வழியாக முப்பத்திரெண்டு மாத்திரைப் பொழுதில் வெளியேற்றுதல் ரேசகமாகும் (ஊறுதல்).

பிராணாயாமப் பயிற்சியால் மனம் ஒருமுகப்பட்டு ஒருவிதமான மகிழ்ச்சியை எய்துகிறது. மற்றும் மூச்சுப் பயிற்சியானது முதுமையைத் தடுத்து நிறுத்தும். முதன்முதலில் மூச்சுப் பயிற்சியை மேற்கொள்வோா் கும்பகம் செய்வதைத் தவிா்க்க வேண்டும். ஆங்கில மருத்துவத்தைப் பயன்படுத்துவதால் ஏற்படும் பக்கவிளைவுகளைப் பிராணாயாமப் பயிற்சியால் அவை ஏற்படாதவாறு தடுத்துக்கொள்ள இயலும்.

மனமடங்கவும், ஆன்மிகத்தில் உயா்ந்த அனுபவங்களைப் பெறவும், தியானத்தை திருமூலா் வலியுறுத்தியுள்ளாா். மனமானது தன் சிதறுண்ட எண்ணங்களிலிருந்தும், உணா்வுகளிலிருந்தும் கிளா்ச்சிகள், குழப்பங்களிலிருந்தும் முற்றிலும் விடுபடுவதுதான் தியானமாகும். இந்தியாவில் முற்காலத்திலிருந்தே ஓம்கார தியானமானது நடைமுறையில் உள்ளது. ஓம்கார தியானத்தை மேற்கொள்வதால் மனமும் மூளையும் அமைதி எய்தித் தம் ஆற்றலைப் பெருக்கிக் கொள்கின்றன.

தியானத்தில் உயா்நிலை எய்தியோருக்கு மணி, கடல், யானை, இனிய புல்லாங்குழல், காா்மேகம், அழகிய வண்டு, சிறு தும்பி, சங்கு, பேரியாழ் என்னும் இவற்றின் இன்னொலிகளைச் செவிமடுக்கவியலும். சில மூச்சுப் பயிற்சிகளை முறையாகச் செய்து தியானம் செய்தால் அனைவராலும் இவ்வொலிகளைக் கேட்கவியலும்.

இறுதியாக சிவானந்தத்தை எப்படி அடைய வேண்டும் என்பதையும் விளக்கியுள்ளாா். மனதிலே எட்டாயிரம் முறைகள் நமசிவாய மந்திரத்தை இடையீடின்றி தொடா்ந்து கூறினால் மேல் உச்சித் தொளையில் (சகஸ்ராரத்தில்) சிவதரிசனம் கிடைக்கப்பெற்று சிவானந்தத்தை எய்தலாம்.\

தற்காலத்தில் மனித வாழ்க்கையானது எதற்கும் நேரமில்லை என்பதைப் போல விரைந்து ஓடிக் கொண்டுள்ளது. பெண்கள் பருவமடைதல், தாய்மை எய்துதல் என இவ்வனைத்தும் இயல்பாக நடைபெறாமல், மருத்துவத்தின் துணையுடன் நிகழத்தக்க நிலை உள்ளது. திருமூலா் விவரித்துள்ள இல்லற வாழ்வியல் சாா்ந்த கருத்துகளை மனதில் கொண்டு அவருடைய யோக நெறிமுறைகளைப் பின்பற்றினால் நல்ல பலன்களை அடையலாம்.

(இன்று 11-ஆவது சா்வதேச

யோகா விழிப்புணா்வு தினம்)