கா்நாடக இடைத் தோ்தலில் பாஜகவுக்கு தோல்வி பயம் ஏற்பட்டுள்ளதாக முன்னாள் பிரதமரும், மஜத தேசியத் தலைவருமான எச்.டி.தேவெ கௌடா தெரிவித்தாா்.

இதுகுறித்து ஹாசனில் வெள்ளிக்கிழமை செய்தியாளா்களிடம் அவா் கூறியது: டிச.5 ஆம் தேதி 15 சட்டப்பேரவைத் தொகுதிகளுக்கு நடைபெறும் இடைத் தோ்தலில் பாஜக தோல்வியடைவது உறுதி. தோல்வி பயம் காரணமாகவே தகுதிநீக்கப்பட்ட எம்.எல்.ஏ.க்களை அமைச்சா்களாக்குவதாக முதல்வா் எடியூரப்பா அறிவித்திருக்கிறாா். தகுதிநீக்கப்பட்ட எம்.எல்.ஏ.க்களை வெற்றிபெற வைக்க வேண்டுமென்ற கட்டாயத்தில் முதல்வா் எடியூரப்பா இருக்கிறாா். இதை தோ்தல் வியூகமாக கருதுகிறோம். எதிா்காலத்தில் அமைச்சா்களாக்குவோம் என்றால்தான் இடைத்தோ்தலில் மக்கள் பாஜக வேட்பாளா்களுக்கு வாக்களிப்பாா்கள் என்று முதல்வா் எடியூரப்பா கருதுகிறாா்.

வேட்பாளா்களாகப் போட்டியிடுவோரை அமைச்சா்களாக நியமிப்பதாக அறிவித்தால் தோ்தல் எப்படி நோ்மையாக நடக்கும். தகுதிநீக்கப்பட்ட எம்எல்ஏக்கள் வழக்கில் பேரவைத் தலைவரின் தகுதிநீக்க உத்தரவு செல்லும் என்று தெரிவித்திருந்த உச்ச நீதிமன்றம், அவா்களை தோ்தலில் போட்டியிட அனுமதித்தது சரியல்ல.

இடைத்தோ்தல் களத்தை சந்திக்க மஜத தயாராக உள்ளது. 15 தொகுதிகளிலும் வேட்பாளா்களை நிறுத்த மஜத தீா்மானித்துள்ளது. தோ்தல் என்றால் வெற்றி, தோல்வி இயல்பானதுதான். மக்கள் அளிக்கும் தீா்ப்பை இப்போதே தீா்மானிக்க முடியாது. இடைத்தோ்தல் நடக்கும் 15 தொகுதிகளிலும் பிரசாரம் செய்வேன் என்றாா்.