குடியரசு தின விழாவை முன்னிட்டு பெங்களூரில் பலத்த பாதுகாப்பு

குடியரசு தின விழாவை முன்னிட்டு பெங்களூரில் பாதுகாப்பு அதிகரிக்கப்பட்டுள்ளதாக போலீஸ் அதிகாரி ஒருவர் தெரிவித்துள்ளார். 

நாடு முழுவதும் குடியரசு தின விழா நாளை கொண்டாடப்பட உள்ள நிலையில் பெங்களூரு முழுவதும் பலத்த பாதுகாப்பு ஏற்பாடுகள் செய்யப்பட்டுள்ளன. அதில் முக்கிய நிகழ்வுகள் நடைபெறும் பீல்ட் மார்ஷல் சாம் மானேக்ஷா அணிவகுப்பு மைதானத்தில் கூடுதல் பாதுகாப்பு போடப்பட்டுள்ளதாகப் பெங்களூரின் தலைமைக் காவலர் பாஸ்கர் ராவ் தெரிவித்துள்ளார். 

இதுகுறித்து அவர் மேலும் கூறுகையில், 

குடியரசு தின விழா அமைதியாகக் கொண்டாடப்படுவதை உறுதி செய்வதற்காகவும், பாதுகாப்பை மேம்படுத்தவும், சட்டம் ஒழுங்கை பராமரிக்கவும் நகர மற்றும் மாநில காவல்துறைக்கு உள்துறை அமைச்சகம் அறிவுறுத்தியுள்ளது. 

மார்ஷல் சாம் மானேக்ஷா அணிவகுப்பு மைதானத்தில் நாளை கர்நாடக  ஆளுநர் வஜுபாய் வாலா தேசியக் கொடியை ஏற்ற உள்ளார்.  இந்த நிகழ்ச்சியில் இரண்டாயிரத்துக்கு மேற்பட்ட பள்ளி, கல்லூரி மாணவ, மாணவிகளின் கலை நிகழ்ச்சிகள் நடத்தப்பட உள்ளது. அதையொட்டி அப்பகுதியில் 150 உயர் அதிகாரிகள் உள்பட 1000-க்கும் மேற்பட்ட போலீஸார் பாதுகாப்புப் பணியில் ஈடுபடுத்தப்பட்டுள்ளனர். 

கொடியேற்றும் நிகழ்ச்சியை அடுத்து இந்திய விமானப்படை (ஐ.ஏ.எஃப்) ஹெலிகாப்டர் மூலம் மலர்களைத் தூவிய பின்னர் தேசிய கீதம் பாடப்படும். மேலும், அணிவகுப்பு மைதானத்தைச் சுற்றி 70 கண்காணிப்பு கேமராக்கள் பொருத்தப்பட்டுள்ளன. நிகழ்ச்சியின் போது எந்தவித அசம்பாவிதங்களும் நிகழாமல் தடுப்பதற்காக வெடிகுண்டு கண்டறியும் குழுவையும் நியமித்துள்ளனர். 

அணிவகுப்பு மைதானத்திற்குச் செல்லும் சாலைகளில் நெரிசல் ஏற்படாவண்ணம் 1 கி.மீட்டர் தூரம் வரை போக்குவரத்து நிறுத்தப்பட்டுள்ளது என்று அவர் தெரிவித்துள்ளார்.