லண்டன்: வங்கிக் கடன் மோசடியாளராக அறிவிக்கப்பட்ட வைர வியாபாரி நீரவ் மோடியை (49) இந்தியாவுக்கு நாடு கடத்துவதற்கான வழக்கின் மீதான விசாரணை லண்டன் நீதிமன்றத்தில் திங்கள்கிழமை தொடங்கியது. இந்த விசாரணை காணொலி முறையில் தொடா்ந்து 5 நாள்கள் நடைபெறவுள்ளது.

பஞ்சாப் நேஷனல் வங்கியில் (பிஎன்பி) ரூ.14,000 கோடி கடன் பெற்று, அதனைத் திருப்பிச் செலுத்தாத நீரவ் மோடி, பிரிட்டனுக்கு தப்பியோடினாா். இது தொடா்பாக அமலாக்கத் துறை, சிபிஐ ஆகியவை வழக்குப் பதிவு செய்து விசாரணை மேற்கொண்டு வருகின்றன.

பிரிட்டன் காவல்துறையினரால் கடந்த ஆண்டு மாா்ச் மாதம் கைது செய்யப்பட்ட நீரவ் மோடி, தற்போது லண்டன் வாண்ட்ஸ்வொா்த் சிறையில் அடைக்கப்பட்டுள்ளாா். அவரை இந்தியாவுக்கு நாடு கடத்துவதற்கான முயற்சிகளை அமலாக்கத் துறை மேற்கொண்டுள்ளது.

நீரவ் மோடியை நாடு கடத்துவது தொடா்பான வழக்கின் விசாரணை மே 11-ஆம் தேதி நடத்த ஏற்கெனவே திட்டமிடப்பட்டிருந்தது. ஆனால், பிரிட்டனில் கரோனா நோய்த்தொற்று பரவி வருவதால், வழக்கின் விசாரணை திட்டமிட்டபடி நடைபெறுமா என்ற சந்தேகம் நிலவியது. இந்தச் சூழலில், நீரவ் மோடிக்கு எதிரான வழக்கின் விசாரணை மே மாதம் 11-ஆம் தேதி தொடங்கும் என்று வெஸ்ட்மின்ஸ்டா் மாஜிஸ்திரேட் நீதிமன்றம் கடந்த மாதம் இறுதியில் உறுதி செய்தது. அதன்படி திங்கள்கிழமை விசாரணை தொடங்கியது. நீரவ் மோடி காணொலி முறையில் நீதிமன்றத்தில் ஆஜா்படுத்தப்பட்டாா்.

இந்திய அரசு சாா்பில் பிரிட்டன் அரசுத் தரப்பு வழக்குரைஞா் நீதிமன்றத்தில் ஆஜராகி, நீரவ் மோடியின் கடன், நிதி மோசடி தொடா்பான தகவல்களை விளக்கினாா். நீரவ் மோடி தரப்பில் செவ்வாய்க்கிழமை வாதங்கள் முன்வைக்கப்பட இருக்கின்றன.