பட்ஜெட் கூட்டத் தொடருக்கு ஏற்பாடுகள் தீவிரம்: ஓம் பிா்லா

நாடு முழுவதும் கரோனா தொற்று வேகமாகப் பரவி வரும் நிலையில் நாடாளுமன்ற பட்ஜெட் கூட்டத் தொடரை பாதுகாப்பாக நடத்துவதற்குத் தேவையான ஏற்பாடுகள் செய்யப்பட்டு வருவதாக மக்களவைத் தலைவா் ஓம் பிா்லா கூறினாா்.

நாடாளுமன்ற பட்ஜெட் கூட்டத் தொடா் இந்த மாத இறுதியில் தொடங்குகிறது. இதுதொடா்பான அதிகாரபூா்வ அறிவிப்பு இன்னும் வெளியாகவில்லை. இருப்பினும், கூட்டத் தொடரை நடத்துவதற்குத் தேவையான ஏற்பாடுகள் நடைபெற்று வருகின்றன.

இதற்கிடையே, நாடு முழுவதும் கரோனா தொற்று வேகமாகப் பரவி வருவதால், நாடாளுமன்ற ஊழியா்களுக்கு கரோனா பரிசோதனை நடத்தப்பட்டது. கடந்த 4-ஆம் தேதியில் இருந்து 8-ஆம் தேதிக்குள் நடத்தப்பட்ட சோதனையில், மாநிலங்களவைச் செயலகத்தில் பணிபுரியும் 65 ஊழியா்கள், மக்களவைச் செயலகத்தில் பணிபுரியும் 200 ஊழியா்கள், மற்ற பிரிவுகளில் பணியாற்றும் 133 பேருக்கு கரோனா பாதிப்பு உறுதியாகியுள்ளதாகத் தகவல்கள் தெரிவிக்கின்றன.

இந்நிலையில், நாடாளுமன்ற வளாகத்தில் அமைக்கப்பட்டுள்ள கரோனா பரிசோதனை மையத்தை மக்களவைத் தலைவா் ஓம் பிா்லா செவ்வாய்க்கிழமை பாா்வையிட்டாா்.

இதுகுறித்து மக்களவைச் செயலகம் வெளியிட்ட அறிக்கையில் கூறப்பட்டிருப்பதாவது:

நாடாளுமன்ற வளாகத்தில் ஊழியா்கள், அதிகாரிகள், எம்.பி.க்கள் ஆகியோருக்கு மேற்கொள்ளப்பட்டு வரும் சுகாதாரப் பாதுகாப்பு நடவடிக்கைகளை ஓம் பிா்லா பாா்வையிட்டு ஆய்வு செய்தாா்.

தொற்றால் பாதிக்கப்பட்டவா்களைத் தொடா்ந்து கண்காணிக்க வேண்டும்; கரோனா தொற்று மேலும் பரவாமல் தடுக்கத் தேவையான நடவடிக்கைகளை மேற்கொள்ள வேண்டும்; 60 வயதுக்கு மேற்பட்ட எம்.பி.க்களுக்கு சிறப்புக் கவனம் செலுத்த வேண்டும் என்று சம்பந்தப்பட்ட அதிகாரிகளுக்கு அவா் உத்தரவிட்டாா் என்று அந்த அறிக்கையில் தெரிவிக்கப்பட்டுள்ளது.