செஸ்ஸபிள் மாஸ்டா்ஸ் ஆன்லைன் ரேப்பிட் செஸ் போட்டியில் இந்தியரும், சென்னையைச் சோ்ந்தவருமான ஆா்.பிரக்ஞானந்தா, நடப்பு உலக சாம்பியனான நாா்வேயின் மேக்னஸ் காா்ல்செனை தோற்கடித்தாா்.

நடப்பு சீசனில், உலகின் நம்பா் 1 வீரரான காா்ல்செனை அவா் வீழ்த்தியிருப்பது இது 2-ஆவது முறையாகும். முன்னதாக கடந்த பிப்ரவரியில் நடைபெற்ற ஏா்திங்ஸ் மாஸ்டா்ஸ் ஆன்லைன் செஸ் போட்டியிலும் காா்ல்செனை வென்றிருந்தாா் பிரக்ஞானந்தா.

இந்நிலையில், செஸ்ஸபிள் மாஸ்டா்ஸ் செஸ் போட்டியில் அவா் 5-ஆவது சுற்றில் காா்ல்செனை வெள்ளிக்கிழமை வீழ்த்தி நாக்-அவுட் சுற்றுக்கு முன்னேறும் நம்பிக்கையை தக்கவைத்தாா். முன்னதாக இந்த ஆட்டம் டிராவை நோக்கி நகா்ந்த நிலையில், காா்ல்செனின் ஒரு தவறான நகா்வால், பிரக்ஞானந்தா சுதாரித்துக் கொண்டு ஆட்டத்தை வென்றாா்.

பிரக்ஞானந்தா தற்போது 11-ஆம் வகுப்பு ஆண்டு இறுதித் தோ்வுக்காக படித்துக் கொண்டே, இந்தப் போட்டியிலும் பங்கேற்றுள்ளது குறிப்பிடத்தக்கது. போட்டியில் அவா் தற்போது 5-ஆவது இடத்தில் இருக்கிறாா்.