பிரதமர் நரேந்திர மோடி தொடங்கி வைத்த ‘எம்வி கங்கா விலாஸ்’ சொகுசு கப்பல் தரை தட்டியதாக தகவல் வெளியான நிலையில் அரசுத் தரப்ப்பில் விளக்கம் அளிக்கப்பட்டுள்ளது.

உலகின் மிக நீளமான ‘எம்வி கங்கா விலாஸ்’ சொகுசு கப்பல் பயணத்தை உத்தரப் பிரதேச மாநிலம் வாரணாசியில் இருந்து பிரதமர் நரேந்திர மோடி ஜனவரி 13 ஆம் தேதி காணொலி காட்சி மூலம் கொடியசைத்து தொடங்கி வைத்தார்.

இந்த கப்பல் மூன்றாம் நாள் பயணமாக பிகார் மாநிலம் சாப்ரா பகுதியில் சென்றபோது ஆழம் குறைவான நீரில் கப்பல் இறங்கியதில் தரை தட்டி நின்றதாகவும், அதிலிருந்த வெளிநாட்டுப் பயணிகளை மாநில பேரிடர் மீட்புக் குழுவினர் சிறிய படகுகள் மூலம் மீட்டதாகவும் செய்திகள் வெளியாகின.

சிறிய கப்பல்கள் மூலம் பயணிகள் வரும் காணொலியை பகிர்ந்து சமாஜ்வாதி தலைவரும் உத்தரப் பிரதேசத்தின் எதிர்க்கட்சித் தலைவருமான அகிலேஷ் யாதவும் கேள்வி எழுப்பி இருந்தார்.

80 பயணிகள் பயணிக்கக்கூடிய கங்கா விலாஸ் சொகுசு கப்பல் குறித்து அதிகாரிகள் கூறுகையில், நாட்டின் சிறந்தவற்றை உலகுக்குக் காண்பிக்கும் வகையில் வடிவமைக்கப்பட்டுள்ளது. 

இதையும் படிக்க | பஞ்சாபை தில்லியிலிருந்து ஆட்சி செய்யக் கூடாது: ராகுல் காந்தி விமர்சனம்

இந்த கப்பல் உலக பாரம்பரியமிக்க இடங்கள், தேசிய பூங்காக்கள், சரணாலயங்கள், நதியின் மலைகள் மற்றும் பிகாரில் உள்ள பாட்னா, ஜார்கண்டில் உள்ள சாஹிப்கஞ்ச், மேற்கு வங்கத்தின் கொல்கத்தா, வங்கதேசத்தின் டாக்கா மற்றும் அஸ்ஸாமின் குவாஹாட்டி போன்ற முக்கிய நகரங்கள் உள்பட 50 சுற்றுலா தலங்களுக்கு 51 நாள்கள் பயணம் மேற்கொள்கிறது.

மொத்தம் 4 ஆயிரம் கிலோ மீட்டர் தொலைவுக்கு பயணிக்க உள்ளது. வெளிநாட்டு பயணிகளும் இதில் பயணம் செய்ய உள்ளனர். 

கங்கா விலாஸ் கப்பல் 62 மீட்டர் நீளமும், 12 மீட்டர் அகலமும் கொண்டது. இந்த கப்பல் மூன்று தளங்கள், 36 சுற்றுலாப் பயணிகள் தங்கும் திறன் கொண்ட 18 அறைகளைக் கொண்டுள்ளது, சுற்றுலாப் பயணிகளுக்கு மறக்கமுடியாத மற்றும் ஆடம்பரமான அனுபவத்தை வழங்குவதற்கான அனைத்து வசதிகளும் உள்ளன. இந்த கப்பலில் மாசு கட்டுப்பாடு மற்றும் ஒலி கட்டுப்பாட்டு தொழில்நுட்பங்கள் உள்ளன.