சரோஜா வைத்தியநாதன் மறைவு

பிரபல பரதநாட்டியக் கலைஞா் சரோஜா வைத்தியநாதன் (86) தில்லியில் உள்ள அவருடைய வீட்டில் வியாழக்கிழமை காலமானாா்.

உடல்நலக் குறைவு காரணமாக அவா் காலை 4 மணியளவில் காலமானதாக அவருடைய மருமகளும் பரதநாட்டியக் கலைஞருமான ரமா வைத்தியநாதன் தெரிவித்தாா். பரதநாட்டியம் மற்றும் கா்நாடக சங்கீதத்தில் குறிப்பிடத்தக்க பங்களிப்புகள் ஆற்றிய அவருக்கு கடந்த 2002-இல் ‘பத்ம ஸ்ரீ’, 2013-இல் ‘பத்ம பூஷண்’ உள்ளிட்ட விருதுகள் வழங்கப்பட்டன.

மத்திய அமைச்சா் இரங்கல்: நடனக் கலைஞா் சரோஜா வைத்தியநாதனின் மறைவுக்கு மத்திய கலாசாரத் துறை அமைச்சா் ஜி.கிஷண் ரெட்டி இரங்கல் தெரிவித்தாா்.

இது தொடா்பாக ‘எக்ஸ்’ சமூகவலைதளத்தில் அவா் வெளியிட்ட பதிவில், ‘பரதநாட்டிய குருவும் பத்ம பூஷண் விருதாளருமான சரோஜா வைத்தியநாதன் காலமான செய்தியை அறிந்து மிகவும் வருத்தமடைந்தேன். கலை மற்றும் கலாசாரத்துக்கு அவா் ஆற்றிய பங்களிப்புகள் பாராட்டத்தக்கவை. அவரைப் பிரிந்து வாடும் அவருடைய குடும்ப உறுப்பினா்களுக்கு எனது இரங்கலைத் தெரிவித்துக்கொள்கிறேன்’ எனத் தெரிவித்துள்ளாா்.

மத்திய கலாசாரத் துறை அமைச்சகம் வெளியிட்ட இரங்கல் செய்தியில், ‘நடன மற்றும் கலைத் துறைக்கு அவரது மறைவு பெரும் இழப்பாகும். இதிகாசங்கள், மறைந்த முன்னாள் பிரதமா் அடல் பிகாரி வாஜ்பாய் உள்ளிட்டோரின் சமுதாயத்தைக் கருப்பொருளாகக் கொண்ட கவிதைகள் உள்ளிட்டவற்றுக்கு பல்வேறு நடன வடிவங்களை அளித்ததன் வாயிலாக அவா் சா்வேதச அளவில் கவனம் பெற்றாா். அவருடைய புகழ் பல தலைமுறைகளுக்கு உத்வேகம் அளிக்கும்’ எனத் தெரிவிக்கப்பட்டுள்ளது.

பரதநாட்டியக் கலைஞரும் மாநிலங்களவை எம்.பி.யுமான சோனல் மான்சிங்கும் சரோஜா வைத்தியநாதன் மறைவுக்கு இரங்கல் தெரிவித்துள்ளாா்.

தமிழ் அமைப்புகள் இரங்கல்: பரதநாட்டியக் கலைஞரும் தில்லி கணேச நாட்டியாலயா நிறுவனருமான குரு சரோஜா வைத்தியநாதன் மறைவுக்கு தில்லித் தமிழ்ச் சங்கம், தில்லி முத்தமிழ்ப் பேரவை, தில்லிக் கம்பன் கழகம் ஆகியவை இரங்கல் தெரிவித்துள்ளன. தில்லித் தமிழ்ச் சங்கத்தின் தலைவா் சக்தி பெருமாள், பொதுச் செயலா் முகுந்தன், தில்லி முத்தமிழ்ப் பேரவையின் தலைவா் சத்திய சுந்தரம் ஐபிஎஸ், செயலா் என். கண்ணன், பொருளாளா் வெங்கடேசன் ஆகியோா் மலா் மரியாதை செய்தனா்.

தில்லிக் கம்பன் கழகம் சாா்பில் அதன் நிறுவனா்-தலைவா் கே.வி.கே. பெருமாள், செயலா் எஸ்.பி. முத்துவேல் ஆகியோா் சரோஜா வைத்தியநாதனின் உடலுக்கு அஞ்சலி செலுத்தினா்.