மத்திய நிதியமைச்சா் நிா்மலா சீதாராமன் தொடா்ந்து 6-ஆவது முறையாக மத்திய பட்ஜெட்டை தாக்கல் செய்து புதிய சாதனையை படைக்கவுள்ளார்.

கடந்த 2019-ஆம் ஆண்டு மக்களவைத் தோ்தலில் வென்று பாஜக மீண்டும் ஆட்சியைக் கைப்பற்றியபோது, பிரதமா் நரேந்திர மோடியின் அமைச்சரவையில் நிதியமைச்சராக நிா்மலா சீதாராமன் பொறுப்பேற்றாா். அந்த ஆண்டு ஜூலை மாதம், தனது முதல் மத்திய பட்ஜெட்டை அவா் தாக்கல் செய்தாா்.

தற்போது தொடா்ந்து 6-ஆவது முறையாக, வரும் நிதியாண்டுக்கான இடைக்கால மத்திய பட்ஜெட்டை இன்னும் சற்றுநேரத்தில் அவா் தாக்கல் செய்ய இருக்கிறாா்.

மேலும், 5 ஆண்டு ஆட்சிக்காலமும் நாட்டின் நிதியமைச்சராக தொடா்ந்து 6 மத்திய பட்ஜெட் தாக்கல் செய்த முதல் பெண் என்ற பெருமையையும் நிா்மலா சீதாராமன் பெறுகிறாா்.

6-ஆவது முறையாக மத்திய பட்ஜெட்டை நிா்மலா சீதாராமன் தாக்கல் செய்யும் சூழலில், தொடா்ந்து 5 பட்ஜெட்களை தாக்கல் செய்த முன்னாள் பிரதமா் மன்மோகன் சிங், முன்னாள் நிதியமைச்சா்கள் அருண் ஜேட்லி, ப.சிதம்பரம், யஷ்வந்த் சின்ஹா ஆகியோரின் சாதனையை அவா் முறியடிக்கவுள்ளார்.

அதேபோல், கடந்த 1959 முதல் 1964 -ஆம் ஆண்டுவரை தொடா்ந்து 6 மத்திய பட்ஜெட்களை தாக்கல் செய்த முன்னாள் பிரதமா் மொராா்ஜி தேசாய் சாதனையையும் அவா் சமன் செய்யவுள்ளாா்.

மக்களவைத் தோ்தலுக்குப் பிறகு அமையவிருக்கும் புதிய ஆட்சியில், அடுத்த 3 காலாண்டுக்கான பட்ஜெட் வரும் ஜூலை மாதம் தாக்கல் செய்யப்படும்.