புது தில்லி: நாடாளுமன்றத்தின் இடைக்கால நிதிநிலை கூட்டத் தொடரில் இன்னும் கட்டி முடிக்கப்படாத மதுரை எய்ம்ஸ் உள்பட 8 விதமான விவகாரங்களை விவாதிக்க அனுமதிக்க வேண்டும் என நாடாளுமன்ற கட்சித் தலைவர்கள் கூட்டத்தில் திமுக சார்பில் செவ்வாய்க்கிழமை கோரப்பட்டது. 

17-ஆவது மக்களவையின் 15-ஆவது கூட்டத் தொடர் புதன்கிழமை (ஜன.31) தொடங்கி பிப்.9-ஆம் தேதி வரை நடைபெறுகிறது. இதை முன்னிட்டு மத்திய நாடாளுமன்ற விவகாரத் துறை அமைச்சர் கூட்டிய அனைத்துக் கட்சி தலைவர்கள் கூட்டத்தில் திமுக சார்பில் நாடாளுமன்ற திமுக குழுத் தலைவர் டி.ஆர்.பாலு, மாநிலங்களவை திமுக தலைவர் திருச்சி சிவா, அதிமுக சார்பில் தம்பிதுரை, மதிமுக பொதுச் செயலர் வைகோ, தமாகா தலைவர் ஜி.கே. வாசன் உள்ளிட்டோர் கலந்து கொண்டு பேசினர்.

இந்தக் கூட்டத்தில் டி.ஆர். பாலு, திருச்சி சிவா ஆகியோர் பேசியதாவது:

தேர்ந்தெடுக்கப்பட்ட ஆட்சிக்கும், அரசியல் சட்டத்துக்கும் புறம்பாக தமிழக ஆளுநர் செயல்பட்டு வருகிறார். இந்திய குடியுரிமைச் சட்டம் இஸ்லாமிய சமூகத்துக்கு எதிராக உள்ளது. இந்தச் சட்டத்தில் உள்ள குறிப்பிட்ட ஷரத்துகள் நீக்கப்பட வேண்டும். 

மதுரையில் எய்ம்ஸ் கட்டுமானத்துக்கு கடந்த 2019-இல் பிரதமர் வந்து அடிக்கல் நாட்டிச் சென்றார். 5 ஆண்டுகளாகியும் எய்ம்ஸ் கட்டடம் கட்டி முடிக்கப்படவில்லை. மற்ற மாநிலங்களில் கட்டி முடிக்கப்பட்டுள்ள நிலையில், தமிழகத்தில் ஏன் கட்டி முடிக்கப்படவில்லை? இது போன்ற விவகாரங்கள் தொடர்பாக இந்தக் கூட்டத்தொடரில் விவாதிக்க வேண்டும். இந்த 8-க்கும் மேற்பட்ட விவகாரங்களுக்கு நோட்டீஸ் கொடுக்க இருக்கிறோம். இந்த விவகாரங்களில் மத்திய அரசின் நிலை குறித்தும் அவையில் தெரிவிக்க வேண்டும் என திமுக சார்பில் கூட்டத்தில் கோரப்பட்டது. 

கூட்டத்தில் பேசிய ஜி.கே. வாசன், கடைசி கூட்டத்தொடர் என்பதால் அனைவருக்கும் வாய்ப்பளிக்கவேண்டும் என்றார். 

கூட்டத்துக்குப் பின்னர் டி.ஆர்.பாலு, திருச்சி சிவா ஆகியோர் செய்தியாளர்களிடம் கூறுகையில், "இந்தக் கூட்டத் தொடரில் 8 நாள் அமர்வுதான். ஆனால், முக்கியமானது. எனவே, மேற்கண்ட விவகாரங்கள் குறித்து நாடாளுமன்றத்தில் விவாதிக்க வேண்டும் என வலியுறுத்தினோம்' என்றனர்.