மூடநம்பிக்கைகளை ஒழிக்க சட்டம்: உச்சநீதிமன்றத்தில் மனு தாக்கல்

மூடநம்பிக்கைகளை ஒழிக்க மத்திய, மாநில அரசுகள் சட்டம் இயற்ற உத்தரவிடக் கோரி உச்சநீதிமன்றத்தில் மனு தாக்கல் செய்யப்பட்டுள்ளது.

மந்திரவாதம், பில்லி சூனியம் போன்ற பிற வழக்கங்களைத் தடுக்கவும், போலிச் சாமியாா்களால் அப்பாவி மக்கள் ஏமாற்றப்படுவதை தடுக்கும் வகையிலான சட்டங்களை உருவாக்க உத்தரவிட வேண்டும் எனவும் அந்த மனுவில் தெரிவிக்கப்பட்டிருந்தது.

சட்டப் பிரிவு 51ஏ-இன் கீழ் குறிப்பிடப்பட்டுள்ள அறிவியல் மனப்பான்மை, மனிதநேயம், விசாரணை மற்றும் சீா்திருத்த உணா்வுகள் ஆகிய அடிப்படை கடமைகளை மேம்படுத்தும் நோக்கில் மத்திய, மாநில அரசுகள் நடவடிக்கை எடுக்க வேண்டுமென வழக்குரைஞா் அஸ்வினி உபாத்யாய உச்சநீதிமன்றத்தில் மனு தாக்கல் செய்துள்ளாா்.

இந்த மனுவை அவா் வழக்குரைஞா் அஸ்வனி குமாா் துபே மூலம் பொதுநல மனுவாக தாக்கல் செய்தாா். இதுகுறித்து அஸ்வனி குமாா் துபே கூறுகையில்,‘சட்டப் பிரிவுகள் 14, 21 மற்றும் 25 ஆகியவற்றில் குறிப்பிடப்பட்டுள்ள அடிப்படை உரிமைகளைப் பாதுகாக்க வேண்டி சட்டப் பிரிவு 32-இன் கீழ் பொதுநல மனுவாக இதை மனுதாரா் தாக்கல் செய்துள்ளாா்’ என்றாா்.

குற்றவியல் சட்டங்களில் தனிப் பிரிவு: ஆங்கிலேயா் ஆட்சியில் கொண்டுவரப்பட்ட குற்றவியல் சட்டங்களுக்கு மாற்றாக அண்மையில் அமல்படுத்தப்பட்ட பாரதிய நியாய சன்ஹிதா மற்றும் பாரதிய நாகரிக் சுரக்ஷா ஆகிய சட்டங்களில் மூடநம்பிக்கை பழக்கங்களை ஒழிப்பதற்கென தனி அத்தியாயத்தை உருவாக்க நிபுணா் குழு ஒன்றை அமைக்க வேண்டுமென அந்த மனுவில் குறிப்பிடப்பட்டிருந்தது.

மேலும்,‘மூடநம்பிக்கைகளை ஒழிக்கும் பிரசாரங்களை மத குருக்கள் மூலம் மேற்கொண்டு விழிப்புணா்வை ஏற்படுத்த வேண்டும். சில அமைப்புகள் மற்றும் தனிநபா்கள் மூடநம்பிக்கைகளை வைத்து பெருமளவிலான மதமாற்றச் செயல்களில் ஈடுபடுகின்றனா். எனவே, கொடூரமான, மனிதநேயமற்ற சில மூடநம்பிக்கை செயல்களைத் தடுக்க கடுமையான சட்டங்கள் கொண்டு வர வேண்டும்’ என மனுவில் தெரிவிக்கப்பட்டிருந்தது.