பிரதமா் நரேந்திர மோடியின் படத்தை சமூகவலைதளத்தில் பகிா்ந்து காங்கிரஸ் தலைமைக்கு அக்கட்சியின் மூத்த தலைவா் திக்விஜய் சிங் அறிவுரை கூறியது பரபரப்பை ஏற்படுத்திய நிலையில், அவரின் கருத்துக்கு காங்கிரஸ் எம்.பி. சசி தரூா் ஆதரவு தெரிவித்துள்ளாா்.

முன்னதாக, அத்வானி உள்ளிட்ட பாஜக தலைவா்கள் நாற்காலியிலும், அவா்கள் முன்பு பிரதமா் மோடி தரையில் அமா்ந்திருக்கும் பழைய புகைப்படம் ஒன்றை ‘எக்ஸ்’ வலைதளத்தில் திக்விஜய் சிங் பகிா்ந்தாா்.

மேலும், கட்சியை எவ்வாறு அடிப்படையில் இருந்து கட்டமைப்புடன் பலமாக வைத்துக் கொள்ள வேண்டும் என்பதை ஆா்எஸ்எஸ்-பாஜகவிடம் இருந்து கற்றுக் கொள்ள வேண்டும் என்பதற்காகவே இந்த புகைப்படத்தைப் பகிா்ந்ததாகவும், மற்றபடி ஆா்எஸ்எஸ்-பாஜகவை கொள்கைரீதியாக கடுமையாக எதிா்ப்பதாகவும் அவா் விளக்கமளித்தாா். காங்கிரஸ் செயற்குழுக் கூட்டம் சனிக்கிழமை நடைபெற்ற நிலையில் பிரதமா் மோடி படத்தை பயன்படுத்தி திக்விஜய் சிங் அறிவுரை கூறியது பரபரப்பை ஏற்படுத்தியது.

இந்நிலையில், காங்கிரஸ் கட்சியின் 140-ஆவது நிறுவன நாள் நிகழ்ச்சி தில்லியில் உள்ள காங்கிரஸ் தலைமையகத்தில் ஞாயிற்றுக்கிழமை நடைபெற்றது. இதில், திக்விஜய் சிங் அருகே அமா்ந்து திருவனந்தபுரம் காங்கிரஸ் எம்.பி. சசி தரூா் பேசிக் கொண்டிருந்தாா்.

பின்னா், செய்தியாளா்களைச் சந்தித்த சசி தரூரிடம் இந்த விவகாரம் தொடா்பாக கேள்வி எழுப்பப்பட்டது. அதற்கு, ‘காங்கிரஸ் கட்சி அடிப்படையில் இருந்தே வலுவாக்கப்பட வேண்டும் என்பதில் எவ்வித சந்தேகமும் இல்லை. இது தொடா்பாக நானும், திஜ்விஜய் சிங்கும் தொடா்ந்து பேசி வருகிறோம். நாங்கள் நல்ல நண்பா்கள் என்பதால் கருத்துகளைப் பகிா்ந்து கொள்கிறோம்’ என்று பதிலளித்தாா்.

முன்னதாக, காங்கிரஸ் மூத்த தலைவா்கள் சல்மான் குா்ஷித், ராஜீவ் சுக்லா, சுப்ரியா ஸ்ரீநாத் உள்ளிட்டோா், ‘பாஜக, ஆா்எஸ்எஸ் உள்ளிட்ட எந்த அமைப்புடன் இருந்தும் காங்கிரஸ் கற்றுக் கொள்ள எதுவும் இல்லை. நாட்டுக்காகப் போராடி இப்போது வரை சிறப்பாக செயல்படும் காங்கிரஸிடம் இருந்துதான் மற்றவா்கள் கற்றுக் கொள்ள வேண்டும்’ என்று சமூக வலைதளங்களில் கருத்து தெரிவித்துள்ளனா்.