வேளாண் திட்டங்களுக்கான செலவினங்களை மாநிலங்கள் விரைவுபடுத்த வேண்டும்; இல்லையெனில், இழப்பை எதிா்கொள்வதுடன் அடுத்தகட்ட தவணையை மத்திய அரசு விடுவிப்பதிலும் சுணக்கம் ஏற்படும் என்று மத்திய வேளாண் துறை அமைச்சா் சிவராஜ் சிங் செளஹான் தெரிவித்தாா்.

2026-27 மத்திய பட்ஜெட், பிப். 1-இல் தாக்கல் செய்யப்பட உள்ள நிலையில், பல்வேறு மாநில வேளாண் துறை அமைச்சா்களுடன் செளஹான் சனிக்கிழமை ஆலோசனைக் கூட்டம் நடத்தினாா்.

தேசிய வேளாண் மேம்பாட்டுத் திட்டம், பசுமைப் புரட்சி திட்டம் உள்ளிட்ட முக்கியத் திட்டங்களின் அமலாக்கத்தில் ஏற்பட்டுள்ள முன்னேற்றம் மற்றும் நிதிப் பயன்பாடு குறித்து விரிவாக விவாதிக்கப்பட்டது.

இக்கூட்டத்தில் செளஹான் பேசியதாவது: வேளாண் திட்டங்களுக்கான செலவினப் பயன்பாட்டில் மாநிலங்கள் வியூக ரீதியிலான அணுகுமுறையைக் கடைப்பிடிக்க வேண்டும். நடப்பு நிதியாண்டில் இத்திட்டங்களுக்காக ஒதுக்கப்பட்ட நிதியை மாா்ச் மாதத்துக்குள் பயன்படுத்துவதன் மூலம் நிா்வாக ரீதியிலான முட்டுக்கட்டைகளைத் தவிா்க்கலாம். வேளாண் திட்டங்களின் திறன்மிக்க செயலாக்கத்தில் தாமதம் ஏற்படாமலும் தடுக்கலாம்.

உரிய காலகட்டத்துக்குள் நிதி ஒதுக்கீட்டை பயன்படுத்த முடியாவிட்டால், அது இழப்புக்கே வழிவகுக்கும். மத்திய அரசு அடுத்தகட்ட தவணையை விடுவிப்பதிலும் சுணக்கம் ஏற்படும்.

மத்திய-மாநில ஒருங்கிணைப்பு: பிரதமரின் விவசாயிகள் உதவித்தொகை திட்டத்தின்கீழ் (பிஎம்-கிஸான்) பலனடைய தகுதியுள்ள விவசாயிகளின் விவரங்களை விரைந்து சரிபாா்த்தல், பயிா்க் காப்பீட்டுத் திட்ட பயனாளிகள் விரிவாக்கம், உரிய நேரத்துக்குள் இழப்பீட்டை உறுதி செய்தல் உள்ளிட்ட பணிகளை விரைவுபடுத்த வேண்டியது அவசியம். போதிய விதை மற்றும் உர இருப்பு, அவற்றின் சமநிலையான பயன்பாடு மற்றும் மத்திய-மாநில ஒருங்கிணைப்பை உறுதி செய்வதும் முக்கியமானது.

நாட்டின் வேளாண் துறையை வலுப்படுத்தவும், விவசாயிகளின் நலன்களைக் காக்கவும் மாநிலங்களுக்கு மத்திய அரசு தொடா்ந்து ஆதரவளிக்கும் என்றாா் செளஹான்.

இந்தக் கூட்டத்தில் உத்தர பிரதேசம், மகாராஷ்டிரம், ராஜஸ்தான், உத்தரகண்ட் உள்ளிட்ட மாநிலங்களின் வேளாண் அமைச்சா்கள், மத்திய வேளாண் துறைச் செயலா் தேவேஷ் சதுா்வேதி உள்ளிட்டோா் பங்கேற்றனா்.