மேற்காசியாவில் இருந்து இந்தியா திரும்பிய 2.60 லட்சம் பயணிகள்: வெளியுறவு அமைச்சகம்

மேற்காசியாவில் இருந்து கடந்த பிப்.28 முதல் 2.60 லட்சம் பயணிகள் இந்தியாவுக்கு திரும்பியதாக வெளியுறவு அமைச்சகம் புதன்கிழமை தெரிவித்தது.

ஈரான் மற்றும் அமெரிக்கா, இஸ்ரேல் இடையே பிப்.28 முதல் கடும் மோதல் ஏற்பட்டுள்ளதால் மேற்காசியாவில் பதற்றமான சூழல் நிலவி வருகிறது. இதனால் வளைகுடா நாடுகளில் சிக்கியுள்ள இந்தியா்களை மீட்கும் முயற்சிகளை மத்திய அரசு மேற்கொண்டு வருகிறது.

இதுதொடா்பாக பல்வேறு அமைச்சகங்கள் இடையே நடைபெற்ற ஆலோசனைக் கூட்டம் குறித்து இந்திய வெளியுறவு அமைச்சகத்தின் கூடுதல் செயலா் அசீம் ஆா் மஹாஜன் செய்தியாளா்களிடம் கூறியதாவது: ஐக்கிய அரபு அமீரகத்தில் உள்ள வெவ்வேறு விமான நிலையங்களில் இருந்து இந்தியாவின் பல்வேறு நகரங்களுக்கு புதன்கிழமை மட்டும் 70 விமானங்கள் இயக்கப்பட்டன.

வளைகுடா மற்றும் மேற்கு ஆசிய பிராந்திய நிலவரத்தை வெளியுறவு அமைச்சகம் தொடா்ந்து கண்காணித்து வருகிறது.

அங்கு சிக்கியுள்ள மாலுமிகள், இந்திய குடிமக்கள் உள்ளிட்டோருக்கு தூதரக சேவைகள் தொடா்ந்து வழங்கப்பட்டு வருகின்றன. இந்திய மாணவா்களுக்கு உதவ தனி கவனம் செலுத்தப்படுகிறது.

10, 12-ஆம் வகுப்புத் தோ்வுகள் ரத்து: கடந்த பிப்.28 முதல் மேற்கு ஆசியாவில் இருந்து 2.60 லட்சம் பயணிகள் இந்தியா திரும்பியுள்ளனா். மேற்கு ஆசியாவில் சிபிஎஸ்இ பாடத்திட்டத்தின்கீழ் பயிலும் 10 மற்றும் 12-ஆம் வகுப்பு மாணவா்களுக்கான தோ்வுகள் ரத்து செய்யப்பட்டன. ஐசிஎஸ்இ மற்றும் கேரள மாநில பாடத்திட்ட தோ்வுகளும் அங்கு ரத்து செய்யப்பட்டுள்ளன.

இதனால் மாணவா்களுக்கு மதிப்பெண் வழங்கும் நடைமுறை குறித்து சம்பந்தப்பட்ட கல்வி வாரியங்கள் விரைவில் அறிவிக்கும் என எதிா்பாா்க்கப்படுகிறது.

ஈரான் தலைநகா் டெஹ்ரானில் உள்ள இந்திய தூதரகம் அங்குள்ள இந்திய மாணவா்களை பாதுகாப்பான பகுதிகளுக்கு அழைத்துச் செல்லும் முயற்சிகளை மேற்கொண்டு வருகிறது.

கத்தாா் வான்வெளி பகுதியளவில் மூடப்பட்டுள்ளது. மாா்ச் 17-ஆம் தேதி 5 விமானங்களை கத்தாா் ஏா்வேஸ் நிறுவனம் இந்தியாவுக்கு இயக்கியது. மாா்ச் 18-ஆம் தேதி 9 விமானங்களை இந்தியாவுக்கு இயக்குவதாக அறிவிக்கப்பட்டது. குவைத் வான்வெளி பிப்.28-ஆம் தேதியில் இருந்து மூடப்பட்டுள்ளது என்றாா்.

பிரதமா் மோடி-யுஏஇ அதிபா் பேச்சு: ஐக்கிய அரபு அமீரக (யுஏஇ) அதிபா் ஷேக் முகமது பின் சையத் அல் நஹ்யானுடன் பிரதமா் நரேந்திர மோடி தொலைபேசி வாயிலாக செவ்வாய்க்கிழமை பேசினாா். ஈரான் மற்றும் அமெரிக்கா, இஸ்ரேல் இடையேயான மோதல் தொடங்கியதில் இருந்து இரண்டாவது முறையாக இருவரும் தொலைபேசியில் ஆலோசனை மேற்கொண் டனா்.

இதுகுறித்து செய்தியாளா்கள் சந்திப்பில் வெளியுறவு அமைச்சக செய்தித் தொடா்பாளா் ரண்தீா் ஜெய்ஸ்வால் கூறுகையில், ‘மேற்கு ஆசிய சூழல் குறித்து பிரதமா் மோடி-அதிபா் சையத் அல் நஹ்யான் ஆலோசனை நடத்தினாா். அப்போது யுஏஇ மீது நடத்தப்பட்ட தாக்குதலில் அப்பாவி மக்கள் உயிரிழந்ததற்கு கடும் கண்டனத்தை மீண்டும் ஒருமுறை பிரதமா் மோடி பதிவு செய்தாா்.

ஹோா்முஸ் நீரிணையில் பாதுகாப்பான கப்பல் போக்குவரத்தை வலியுறுத்தியதோடு மேற்கு ஆசிய பிராந்தியத்தில் விரைவில் அமைதி, பாதுகாப்பு மற்றும் ஸ்திரத்தன்மையை நிலைநிறுத்த இரு நாட்டுத் தலைவா்களும் உறுதிபூண்டனா்’ என்றாா்.