ஸ்ரீவில்லிபுத்தூர் கல்வி மாவட்டத்தில் தேர்வு எழுதிய மாணவ மாணவியரில் 97.43 சதவீதம் பேர் தேர்ச்சி பெற்றுள்ளனர். இது கடந்த ஆண்டு தேர்ச்சி விகிதத்தை விட 1.93 சதவீதம் அதிகமாகும்.

இது குறித்து ஸ்ரீவில்லிபுத்தூர் கல்வி மாவட்ட அலுவலர் சர்வேஸ்வரன், வியாழக்கிழமை செய்தியாளர்களிடம் கூறியதாவது:
ஸ்ரீவில்லிபுத்தூர் கல்வி மாவட்டத்தில் பிளஸ் 2 தேர்வை 7291 மாணவ மாணவியர் எழுதினர். இவர்களில் 7104 பேர் தேர்ச்சி பெற்றுள்ளனர். இது 97.43 சதவீதமாகும். கடந்த ஆண்டு 95.50 சதவீதம் மாணவ மாணவியர் தேர்ச்சி பெற்றிருந்தனர்.

ஸ்ரீவில்லிபுத்தூர் கல்வி மாவட்ட அளவில் ராஜபாளையம், சின்மயா வித்யாலயா மெட்ரிக் பள்ளி மாணவர் எம்.பிரபு வைரவேல் 1174 மதிப்பெண்கள் பெற்று முதலிடம் பெற்றுள்ளார். ஸ்ரீவில்லிபுத்தூர் லயன்ஸ் மெட்ரிக்குலேஷன் மேல்நிலைப் பள்ளி மாணவர் ஆர்.அருண் 1170 மதிப்பெண்கள் பெற்று இரண்டாம் இடம் பெற்றுள்ளார். ராஜபாளையம் சின்மயா வித்யாலயா மெட்ரிக் பள்ளி மாணவி ஆர்.கிருபாளினி, எஸ்.சரவணகணேஷ் ஆகியோர் 1168 மதிப்பெண்கள் பெற்று மூன்றாம் இடம் பெற்றுள்ளனர் என்றார் அவர்.