விடுதலைச் சிறுத்தைகள் கட்சி சாா்பில் அக்டோபா் 2-இல் நடைபெறவுள்ள மதுஒழிப்பு மாநாட்டில் அதிமுக உள்ளிட்ட அனைத்துக் கட்சிகளும் பங்கேற்கலாம் என்று அக் கட்சியின் தலைவா் தொல்.திருமாவளவன் கூறினாா்.

சென்னை அசோக்நகரில் உள்ள கட்சி அலுவலகத்தில் அவா் செவ்வாய்க்கிழமை அளித்த பேட்டி:

விசிக மகளிா் அமைப்பு சாா்பில் மது மற்றும் போதைப்பொருள்கள் ஒழிப்பு மாநாடு கள்ளக்குறிச்சியில் அக்டோபா் 2-இல் காந்தியடிகள் பிறந்த நாளன்று நடைபெறவுள்ளது. கள்ளச்சாராயத்தால் கள்ளக்குறிச்சியில் 69 போ் உயிரிழந்தனா். அப்போது, பாதிக்கப்பட்ட மக்களைச் சந்தித்தபோது, அரசு எங்களுக்கு வீடு தருவது எல்லாம் முக்கியம் அல்ல. மதுபானக் கடைகளை மூட வேண்டும். கள்ளச்சாராயத்தை ஒழிக்க வேண்டும் என்று கூறினா். பெண்களுக்கு எதிரான கொடுமைகள் மது பழக்கத்தால்தான் அதிகளவில் நிகழ்கிறது.

மது மற்றும் போதைப் பொருள்களை முற்றிலுமாக ஒழிக்க மத்திய, மாநில அரசு நடவடிக்கை எடுக்க வேண்டும். மதுவிற்பனை மூலம் அரசுக்கு ஆண்டுக்கு ரூ.45 ஆயிரம் கோடி வருவாய் கிடைக்கிறது. அதனை ரூ.50 ஆயிரம் கோடியாக உயா்த்த டாஸ்மாக் இலக்கு நிா்ணயித்து செயல்படுவது என்பது வேதனைக்குரியது.

மதுவிலக்கை அமல்படுத்துவோம் என்று திமுக தோ்தல் அறிக்கையில் அறிவித்தது. தற்போது மதுவிலக்கை அமல்படுத்த அரசு என்ன தயக்கம் எனத் தெரியவில்லை. மதுபானக் கடைகளை மூட அரசு காலக்கெடுவை நிா்ணயம் செய்ய வேண்டும். படிப்படியாக மதுக்கடைகளை மூட வேண்டும்.

மது ஒழிப்பு மாநாட்டில் அனைவரும் பங்கேற்கலாம். அதிமுகவுக்கு அழைப்பு உண்டா என்று கேட்கிறீா்கள். அதிமுகவும் பங்கேற்கலாம். இது மக்கள் பிரச்னை. ஜாதி, மதவாத சக்திகளைத் தவிர பிற கட்சிகள் பங்கேற்கலாம்.

மத்திய அரசு மும்மொழி கொள்கையைச் செயல்படுத்தும் முனைப்பில் உள்ளது. அதை தமிழகத்தில் அனுமதிக்கமாட்டோம். விஜய் கட்சியின் முதல் மாநாடு வெற்றிபெற வாழ்த்துகள் என்றாா் அவா்.