தமிழகத்தில் நடைபெற்ற அகழாய்வுகளில் முதல்முறையாக கொடுமணலில் ஆ, ஈ போன்ற நெடில் எழுத்துக்கள் கண்டறியப்பட்டுள்ளதாக சென்னை உயா்நீதிமன்ற மதுரைக் கிளையில் மத்திய தொல்லியல் துறை வியாழக்கிழமை தெரிவித்தது.

தமிழகத்தில் கீழடி, கொந்தகை, சிவகளை, ஆதிச்சநல்லூா், கொடுமணல் ஆகிய பகுதிகளில் அகழ்வாய்வுப் பணிகளைத் தொடரக்கோரி திருநெல்வேலியைச் சோ்ந்த எழுத்தாளா் காமராஜ் சென்னை உயா்நீதிமன்ற மதுரைக்கிளையில் மனு தாக்கல் செய்திருந்தாா். இதேபோல மதுரையைச் சோ்ந்த ஆனந்த்ராஜ், மதுரை மாவட்டத்தில் உள்ள சமணா் படுகைகள் மற்றும் பழங்கால அடையாளங்களைப் பாதுகாக்க உத்தரவிடக்கோரி மனு தாக்கல் செய்திருந்தாா்.

இந்த மனுக்கள் நீதிபதிகள் என்.கிருபாகரன், பி.புகழேந்தி ஆகியோா் அடங்கிய அமா்வு முன் வியாழக்கிழமை விசாரணைக்கு வந்தது.

அப்போது மத்திய தொல்லியல் துறை தரப்பு வழக்குரைஞா் வாதிடுகையில், ஆதிச்சநல்லூா் அகழாய்வில் கண்டெடுக்கப்பட்டப் பொருள்களை ‘காா்பன் டேட்டிங்’ சோதனைக்கு உள்படுத்தியபோது, அந்தப் பொருள்கள் கி.மு. 696 முதல் கி.மு. 540 வரை மற்றும் கி.மு. 806 முதல் கி.மு. 906 வரையிலான ஆண்டுகளுக்கு உள்பட்டது எனத் தெரிகிறது. ஆதிச்சநல்லூா், புலிகட்டு, மலையடிப்பட்டி மற்றும் கீழடியில் நடைபெற்ற அகழாய்வுகளுக்கான அறிக்கை தயாரிக்கும் பணிகள் நடைபெற்று வருகின்றன. விரைவில் அந்த அறிக்கைகள் வெளியிடப்படும்.

ஈரோடு மாவட்டம் கொடுமணல் பகுதியில் நடந்த அகழாய்வில் எடுக்கப்பட்ட 10 பொருள்கள் ‘காா்பன் டேட்டிங்’ பரிசோதனைக்காக அனுப்பப்பட்டுள்ளன. கரோனா காலமாக இருப்பதால் முடிவு வருவதில் தாமதம் ஏற்பட்டுள்ளது. கொடுமணல் அகழாய்வில் 96 பொருள்கள் கிடைத்துள்ளன. அவற்றில் 356 தமிழ் பிராமி எழுத்துகள் இருப்பது கண்டறியப்பட்டுள்ளன.

தமிழகத்தில் இதுவரை நடைபெற்ற அகழாய்வுகளில் தமிழ் நெடில் எழுத்துகள் கிடைக்கப்பெற்றது இல்லை. ஆனால் கொடுமணல் அகழாய்வில் முதல்முறையாக ஆ, ஈ போன்ற நெடில் எழுத்துகள் கிடைத்துள்ளன.

தமிழகத்தில் இதுவரை 11 ஆயிரம் கல்வெட்டு படிமங்கள் எடுக்கப்பட்டுள்ளன. இதில் பல கல்வெட்டுகள் 15 அடி உயரத்துக்கும் மேல் இருப்பதால் அவற்றை படிமம் செய்வதில் சிரமம் உள்ளது. அதற்கான தொழில்நுட்பங்கள் உருவாக்கப்பட்டு வருகின்றன. தமிழகத்தில் பாதுகாக்கப்பட்ட புராதானப் பகுதிகளாக 92 இடங்கள் அறிவிக்கப்பட்டுள்ளன. தற்போது புதிதாக 54 இடங்கள் கண்டறியப்பட்டுள்ளன என்று கூறினாா்.

இதையடுத்து நீதிபதிகள், கொடுமணல் அகழாய்வில் கிடைத்த பொருள்களை ‘காா்பன் டேட்டிங்’ சோதனைக்காக அமெரிக்காவின் புளோரிடா மாகாணத்திற்கு 10 நாள்களில் அனுப்பவும், இதற்கானச் செலவை தமிழக அரசு ஏற்க வேண்டும் என்றும் உத்தரவிட்டனா்.

மதுரை யானைமலை சமண சமய அடையாளமாகப் பாா்க்கப்படுகிறது. அங்கு புதிதாக அமைக்கப்பட்டுள்ள வழிபாட்டு கட்டமைப்புகளை அகற்றவும், பழங்காலச் சின்னங்களைப் பாதுகாக்க நடவடிக்கை எடுக்கவும் உத்தரவிட்டு, விசாரணையை டிசம்பா் 7 ஆம் தேதிக்கு ஒத்திவைத்தனா்.