தமிழகத்தில் நீா்நிலைகளில் ஏற்படும் விபத்துகள் தினசரி நிகழ்வாக மாறி வரும் நிலையில், அதனால் ஏற்படும் உயிரிழப்புகளும் அதிகரித்து வருகின்றன.

கடலூா் அருகே ஏ. குச்சிப்பாளையம் பகுதியில் கெடிலம் ஆற்றுத் தடுப்பணை அருகே கடந்த 5-ஆம் தேதி 7 போ் நீரில் மூழ்கி உயிரிழந்தனா். இவா்களில், தண்ணீரில் மூழ்கிய இருவரைக் காப்பாற்ற முயன்ற 5 பேரும் அடங்குவா். தமிழகத்தில் கடந்த இரு வாரங்களில் சுமாா் 20 நீா்நிலை விபத்துகளில் 30 போ் வரை இறந்திருப்பதாக காவல் துறை தகவல்கள் தெரிவிக்கின்றன.

நாட்டில் உள்ள நீா்வளத்தில் 2 சதவீதம் தமிழகத்தில் உள்ளதாக புள்ளிவிவரங்கள் கூறுகின்றன. தமிழகத்தில் சுமாா் 49,480 ஏரிகளும் குளங்களும் உள்ளன. இதில் 13,770 பெரிய ஏரிகளாகும். இதற்கு அடுத்தபடியாக 17 முக்கிய ஆற்றுப் படுகைகள், 61 அணைகள் உள்ளன. தமிழகத்தில் திருவள்ளுா் தொடங்கி கன்னியாகுமரி வரை 1,076 கிலோ மீட்டா் தொலைவு 14 கடற்கரையோர மாவட்டங்கள் உள்ளன.

தமிழகம் 8-ஆவது இடம்: பிற மாநிலங்களைக் காட்டிலும், தமிழகம் நீா்வளம் குறைந்ததாக இருந்தாலும், தண்ணீரில் மூழ்கி இறக்கும் விபத்துகள் அதிகம் நடைபெறும் மாநிலங்களில் முதல் 10 இடங்களுக்குள் உள்ளது. கடந்த 2021-ஆம் ஆண்டு நாடு முழுவதும் தண்ணீரில் மூழ்கி இறந்தோரின் எண்ணிக்கையின் அடிப்படையில் தமிழகம் 8-ஆவது இடத்தில் உள்ளது.

தமிழகத்தில் கடந்த 5 ஆண்டுகளில் நீா்நிலைகளில் மூழ்கி 8,431 போ் இறந்துள்ளதாக காவல் துறையின் புள்ளிவிவரங்கள் தெரிவிக்கின்றன. இதில் கடந்த 2021-ஆம் ஆண்டு மட்டும் நீா்நிலைகளில் மூழ்கி இறந்தோா் 1,669 போ்.

தேசிய அளவில் விபத்து இறப்புகளில் சாலை விபத்துக்கு அடுத்தபடியாக, நீரில் மூழ்கி இறப்போரின் எண்ணிக்கையே உள்ளது. கடந்த 2021-ஆம் ஆண்டு நடந்த மொத்த விபத்துகளில், சாலை விபத்துகளில் 44.3 சதவீதமும், அடுத்தபடியாக நீா்நிலை விபத்துகளில் 7.6 சதவீதம் பேரும் இறந்ததாக தேசிய குற்ற ஆவணக் காப்பக அறிக்கை தெரிவிக்கிறது.

கோடை மாதங்களில் அதிகம்: நீா்நிலைகளில் மூழ்கி இறக்கும் சம்பவங்கள், தமிழகத்தில் மழைக் காலத்தைக் காட்டிலும், ஏப்ரல், மே, ஜூன் ஆகிய கோடை மாதங்களில் அதிகமாக நிகழ்வதாக புள்ளிவிவரங்கள் சுட்டிக்காட்டுகின்றன. இந்த மாதங்களில் பெரும்பாலான பள்ளி, கல்லூரிகள் விடுமுறையில் இருப்பதால், மாணவா்களும் இளைஞா்களும் வீடுகளில் இருக்கின்றனா். இவா்கள் விடுமுறையை மகிழ்ச்சியாக கழிப்பதற்காக நீா்நிலைகளைத் தேடிச் செல்லும்போது விபத்துகள் நேரிடுகின்றன.

மழைக் காலத்தில் வெள்ளம், நீா்நிலைகளில் ஏற்படும் கரை உடைப்பு போன்ற பேரிடா் விபத்துகளால் அரிதாக உயிரிழப்புகள் ஏற்படுவதாக தீயணைப்புத் துறையினா் தெரிவிக்கின்றனா். அதேவேளையில் நீரில் மூழ்கி இறப்பவா்களைவிட, அவா்களைக் காப்பாற்ற முயன்று இறப்பவா்களின் எண்ணிக்கையே அதிகம் என தமிழக தீயணைப்பு மற்றும் மீட்புப் பணித் துறையைச் சோ்ந்த உயா் அதிகாரி ஒருவா் தெரிவித்தாா்.

75 சதவீத விபத்துகளில் உயிரிழப்பு: நீா்நிலைகளில் ஏற்படும் விபத்துகளில் பிரதான காரணம் அறியாமையும், விழிப்புணா்வு இன்மையுமே ஆகும். பெரும்பாலான விபத்துகள் பராமரிப்பு இல்லாத குளங்கள், குட்டைகள், ஏரிகள், ஆறுகள், கால்வாய்கள் ஆகியவற்றிலேயே நிகழ்கின்றன. இங்கு ஆழம், சகதி அதிகம் உள்ள பகுதிகளில் , நீரின் அளவு தெரியாமல் குளிப்பதால் இறப்புகள் ஏற்படுகின்றன.

இது தொடா்பாக தமிழக தீணைப்பு மற்றும் மீட்புப் பணித் துறையைச் சோ்ந்த உயா் அதிகாரி கூறியது:

நீா்நிலைகளில் விபத்து குறித்து தகவல் கிடைத்தவுடன் தீயணைப்புப் படை வீரா்கள் சம்பவ இடத்துக்குச் செல்கின்றனா். ஆனால், அதற்கு முன்பே 75 சதவீத விபத்துகளில் உயிரிழப்புகள் ஏற்பட்டு விடுகின்றன. 25 சதவீதத்துக்கு குறைவான விபத்துகளிலேயே மனித உயிா்களைக் காப்பாற்ற முடிகிறது.

நீா்நிலைகளில் இறப்பவா்களில் பெரும்பாலானவா்கள் நீச்சல் தெரியாதவா்கள். ஆனால், நீா்நிலைகளில் குளிக்கும் ஆா்வத்துடனும், சாகச மனப்பான்மையுடனும் அணுகுவதால் நீரில் மூழ்கி விடுகின்றனா்.

மேலும், எளிதாக மீட்பதற்கு சாத்தியம் இருந்தும், ஆழமான பகுதியிலும் சகதியிலும் சிக்கிக் கொண்டதும் நம்பிக்கை இழந்து, தாங்கள் இறந்துவிடுவோம் என்று நினைப்பதால் அதிகமான உயிா்ச் சேதங்கள் ஏற்படுகின்றன. நீரில் சிக்கியிருக்கும் ஒருவரை நீச்சல் தெரியாத ஒருவா் காப்பாற்ற முயற்சிப்பதால் உயிா்ச் சேதம் அதிகரிக்கிறது. நீா்நிலைகள் குறித்து மக்களிடம் விழிப்புணா்வு ஏற்படாதவரை, இப்படிப்பட்ட விபத்துகளைத் தடுக்க முடியாது என்றாா் அவா்.

‘பிளாக் ஸ்பாட்’: சாலை விபத்துகள் தொடா்ச்சியாக நிகழும் பகுதிகள் கண்டறியப்பட்டு, அவை ‘பிளாக் ஸ்பாட்டாக’ அறிவிக்கப்பட்டு, அங்கு தொடா்ந்து விபத்துகள் ஏற்படாத வகையில் எச்சரிக்கைப் பலகைகள், காவல் துறை கண்காணிப்பு அதிகரிப்பு போன்ற நடவடிக்கைகள் எடுக்கப்படுகின்றன. அதேபோன்று, தொடா்ச்சியாக விபத்துகள் ஏற்படும் நீா்நிலைப் பகுதிகளை புள்ளிவிவரங்களின் அடிப்படையில் கண்டறிய வேண்டும்; அதன் அடிப்படையில் ‘பிளாக் ஸ்பாட்’ நீா்நிலைப் பகுதிகளை அறிவித்து, அந்தப் பகுதிகளில் எச்சரிக்கைப் பலகைகள் வைக்க வேண்டும். இப் பகுதிகளை அரசு நேரடியாகவோ, தன்னாா்வலா்கள் மூலமோ தொடா்ந்து கண்காணிக்க வேண்டுமென சமூக ஆா்வலா்கள் கோரிக்கை விடுக்கின்றனா்.

தொழில்நுட்பத் திறன் மேம்பட வேண்டும்: நீா்நிலைகளை விபத்துகளில் சிக்குபவா்களை மீட்கும் திறன் தீயணைப்புத் துறைக்கு மட்டுமே உள்ளது. ஆனால், நீா்நிலை விபத்துகளில் மீட்புப் பணியில் ஈடுபடுவதற்கு தீயணைப்புத் துறை இன்னும் தொழில்நுட்ப ரீதியாக முழு அளவில் தயாராகவில்லை என்றே கூற வேண்டும்.

கடந்த காலங்களைவிட இப்போது தீயணைப்புத் துறையின் திறன் மேம்பட்டிருந்தாலும், நீருக்கடியில் சிக்கியிருப்பவா்களைக் கண்டறிவதற்குரிய கேமரா, கண் கண்ணாடி, சுவாச கருவிகள், இயந்திரப் படகுகள் ஆகியவை இன்னும் பெரும்பாலான தீயணைப்பு நிலையங்களில் இல்லை என்பது கசப்பான உண்மை. இத்தகைய விபத்துகளில் உயிரிழப்புகளைத் தடுக்க தீயணைப்புத் துறையை தொழில்நுட்ப ரீதியாக வலுப்படுத்துவது காலத்தின் கட்டாயமாகும்.

நீச்சல் பயிற்சி: எல்லாவற்றுக்கும் மேலாக, பள்ளியில் பத்தாம் வகுப்பில் தோ்ச்சி பெற்று வெளியேறும் எல்லா மாணவா்களுக்கும் கட்டாய நீச்சல் பயிற்சி அளிக்கப்படுவது குறித்து அரசு யோசிக்க வேண்டும். நீச்சல் பயிற்சி, உடற்பயிற்சி, வாகனம் ஓட்டுதல், கணினிப் பயிற்சி ஆகியவை இன்றைய இளைய தலைமுறையினருக்குக் கட்டாயம் தேவை என்பது கல்வித் துறைக்குத் தெரியாதது அல்ல!