குற்றாலம் குற்றாலநாதசுவாமி கோயில் ஐப்பசி விஷூத் திருவிழா இன்று கொடியேற்றத்துடன் தொடங்கியது.

இக்கோயிலில் நடைபெறும் பல்வேறு முக்கியமான விழாக்களில் ஒன்றான ஐப்பசி விஷூத் திருவிழா இன்று காலையில் கொடியேற்றத்துடன் தொடங்கியது. அதனைதொடா்ந்து திருவிலஞ்சிக்குமாரா் குற்றாலநாதசுவாமி கோயிலுக்கு வருகை நிகழ்ச்சி நடைபெற்றது.

மாலையில் திருவிலஞ்சிக்குமாரா் வெள்ளி சப்பரத்திலும், சுவாமி, அம்பாள் வெள்ளி ஏக சிம்மாசனத்திலும் வீதியுலா நடைபெற்றது. விழாவில் 12-ம் தேதியன்று பஞ்சமூர்த்திகள் புறப்பாடு நிகழ்ச்சியும், 13-ம் தேதியன்று தேரோட்டமும், 15-ம்தேதியன்று காலை மற்றும் இரவில் நடராஜ மூர்த்திக்குத் தாண்டவ தீபாராதனையும்,16-ம் தேதியன்று சித்திரசபையில் நடராஜ மூர்த்திக்கு அபிஷேகம் மற்றும் பச்சை சாத்தி தாண்டவ தீபாராதனையும் நடைபெறுகிறது.

விழா நாட்களில் காலை மற்றும் இரவில் அபிஷேகம், அலங்காரம், தீபாராதனை மற்றும் பல்வேறு வாகனங்களில் வீதியுலா நடைபெறுகிறது. விழாவிற்கான ஏற்பாடுகளை கோயில் உதவி ஆணையா் ரா.விஜயலெட்சுமி தலைமையில் கோயில் பணியாளா்கள் செய்து வருகின்றனா்.