இந்தியா - இலங்கை இடையிலான இரண்டாவது டெஸ்ட் போட்டியில் 2-வதுநாளான இன்று இந்திய அணி தனது முதல் இன்னிங்ஸில் 393 ரன்களுக்கு ஆட்டமிழந்தது. பிறகு ஆடிய இலங்கை அணி ஆட்டநேர முடிவில் 3 விக்கெட் இழப்புக்கு 140 ரன்கள் எடுத்துள்ளது.

இலங்கைக்கு சுற்றுப் பயணம் மேற்கொண்டுள்ள இந்திய கிரிக்கெட் அணி, அங்கு 3 போட்டிகள் கொண்ட டெஸ்ட் தொடரில் விளையாடி வருகிறது. காலேவில் நடந்த முதல் போட்டியில் இந்திய அணி ஆதிக்கம் செலுத்திய போதிலும், துரதிர்ஷ்டவசமாக 63 ரன்கள் வித்தியாசத்தில் தோல்வியைத் தழுவியது. 2-வது டெஸ்டில், முதல்நாள் ஆட்ட நேர முடிவில், இந்திய அணி 87.2 ஓவர்களில் 6 விக்கெட் இழப்புக்கு 319 ரன்களைக் குவித்தத. சஹா 19 ரன்களுடன் களத்தில் இருந்தார்.

இன்று சஹாவுடன் இணைந்து நன்றாக ஆடுவார் என எதிர்பார்க்கப்பட்ட அஸ்வின் 2 ரன்களில் ஆட்டமிழந்தார். மிஸ்ரா 50 பந்துகள் வரை தாக்குப்பிடித்தார். அவர் 24 ரன்களில் அவுட் ஆனார். இந்திய அணி மதிய உணவு இடைவேளையின்போது 8 விக்கெட் இழப்புக்கு 386 ரன்கள் எடுத்தது. அப்போது இந்திய அணி 23.4 ஓவர்களில் 67 ரன்கள் மட்டுமே எடுத்திருந்தது.

அதன்பிறகு,  சஹாவின் விக்கெட்டை வீழ்த்தினார் ஹெராத். சஹா 56 ரன்களில் அவுட் ஆனார். மீண்டும் இஷாந்த் சர்மாவின் விக்கெட்டை வீழ்த்தினார் ஹெராத். இதனால் இந்திய அணி, தனது முதல் இன்னிங்ஸில் 393 ரன்களுக்கு ஆல் அவுட் ஆனது. ஹெராத் 4 விக்கெட்டுகளை வீழ்த்தினார்.

தேநீர் இடைவேளையின்போது இலங்கை அணி தனது முதல் இன்னிங்ஸில், 21 ஓவர்களில் 1 விக்கெட் இழப்புக்கு 65 ரன்கள் எடுத்தது. கருணாரத்னேவின் விக்கெட்டைத் தனது முதல் ஓவரில் வீழ்த்தினார் உமேஷ் யாதவ்.

பிறகு கவுசல் சில்வாவும் சங்ககாரவும் கவனமாக ஆடினார்கள். சங்ககாராவின் விக்கெட்டை அஸ்வின் வீழ்த்தினார். சங்ககாரா 32 ரன்களில் ஆட்டமிழந்தார். பிறகு சில்வாவின் விக்கெட்டை (51) மிஸ்ரா வீழ்த்தினார்.

2-ம் நாள் ஆட்டநேர முடிவில், இலங்கை அணி, தனது முதல் இன்னிங்ஸில், 53 ஓவர்களில் 3 விக்கெட் இழப்புக்கு 140 ரன்களை எடுத்துள்ளது. திரிமானே 28, மேத்யூஸ் 19 ரன்களுடன் களத்தில் உள்ளார்கள்.

2-வது டெஸ்ட்: ஹைலைட்ஸ் வீடியோ