அமெரிக்க ஓபன்: அரையிறுதிக்குத் தகுதி பெற்று வீனஸ் வில்லியம்ஸ் சாதனை!

அமெரிக்க ஒபன் டென்னிஸ் போட்டியில் அமெரிக்காவின் வீனஸ் வில்லியம்ஸ் அரையிறுதிக்கு முன்னேறியுள்ளார்.

இதன் அடிப்படையில் அமெரிக்க ஓபன் வரலாற்றில் அரையிறுதிக்குத் தகுதி பெற்ற வீராங்கனைகளில் அதிக வயது கொண்டவர் என்கிற சாதனையை நிகழ்த்தியுள்ளார். வீனஸுக்கு 37 வயது. 

வீனஸ் வில்லியம்ஸ் - கிவிட்டோவா இடையே இடையே விறுவிறுப்பாக நடைபெற்ற இந்த ஆட்டத்தின் முடிவில், 6-3, 3-6, 7-6(2) என்ற செட் கணக்கில் வீனஸ் வில்லியம்ஸ், கிவிட்டோவாவை வீழ்த்தி அரையிறுதிக்கு முன்னேறியுள்ளார். 1994-க்குப் பிறகு ஒரு கிராண்ஸ்லாமின் அரையிறுதிக்குத் தகுதிபெற்ற அதிக வயதுடைய வீராங்கனை என்கிற பெருமையையும் வீனஸ் வில்லியம்ஸ் பெற்றுள்ளார்.

மற்றொரு காலிறுதியில் ஸ்லோன் ஸ்டீபனஸ், முந்தைய சுற்றில் ஷரபோவை வீழ்த்திய லாத்வியாவின்  அனஸ்தாஸிஜா செவஸ்டோவாவைத் தோற்கடித்து அரையிறுதிக்கு முன்னேறினார். ஸ்லோன் ஸ்டீபனஸ், 6-3, 3-6, 7-6(7-4) என்ற செட் கணக்கில் வென்றார். 

அமெரிக்க ஓபன் வரலாற்றில் காலிறுதியில் மூன்று கருப்பின வீராங்கனைகள் தகுதிபெற்றது இதுவே முதல்முறை. வீனஸ் வில்லியம்ஸ், ஸ்லோன் ஸ்டீபன்ஸ், மேடிசன் கீஸ் ஆகிய மூவரில் இருவர் இதுவரை அரையிறுதிக்குத் தகுதி பெற்றுள்ளார்கள். 

அரையிறுதியில் ஸ்லோன் ஸ்டீபன்ஸை எதிர்கொள்கிறார் வீனஸ் வில்லியம்ஸ்.

மற்ற இரு காலிறுதிப் போட்டிகளில் கரோலினா பிளிஸ்கோவா - கோகோ வான்டெவெக், மேடிசன் கீஸ் -  கையா கானேபி ஆகியோர் மோதுகிறார்கள்.