ஆஸ்திரேலிய வேகப்பந்துவீச்சாளர் டெளக் பொலிஞ்சர் (36) அனைத்து விதமான கிரிக்கெட் போட்டிகளில் இருந்தும் ஓய்வு பெறுவதாக திங்கள்கிழமை அறிவித்தார்.
இதுவரை 12 டெஸ்ட் கிரிக்கெட் போட்டிகளில் ஆடியுள்ள அவர் 50 விக்கெட்டுகளும், 39 ஒருநாள் கிரிக்கெட்டில் 62 விக்கெட்டுகளும் வீழ்த்தியுள்ளார். டெஸ்ட் மற்றும் ஒருநாள் போட்டிகளில் அவரது சராசரி முறையே 25.9 மற்றும் 23.9 ஆகும்.
ஆஸ்திரேலியாவுக்காக 9 டி20 போட்டிகளில் ஆடியுள்ள அவர், அதே எண்ணிக்கையிலான விக்கெட்டுகளை வீழ்த்தியுள்ளார். உள்நாட்டு கிரிக்கெட்டில் நியூ செளத் வேல்ஸ் அணிக்காக 124 ஆட்டங்களில் களம் கண்டுள்ளார்.
இந்த ஆண்டு வரையில் பிக் பாஷ் லீக் போட்டியில் விளையாடி அவர், முதல்தர கிரிக்கெட்டில் மொத்தம் 411 விக்கெட்டுகள் வீழ்த்தியுள்ளார். சர்வதேச கிரிக்கெட்டில் கடைசியாக அவர் 2010 ஆஷஸ் தொடரில் இங்கிலாந்துக்கு எதிரான 2-ஆவது டெஸ்டில் பங்கேற்றிருந்தார்.