2018-ம் ஆண்டு 11-ஆவது சீசன் ஐபிஎல் போட்டித் தொடர் ஏப்ரல் 7-ந் தேதி முதல் மே 27-ந் தேதி வரை மொத்தம் 51 நாட்கள் நடைபெறுகிறது. இதில் ஏப்ரல் 7-ந் தேதி முதல் போட்டியும், மே 27-ந் தேதி இறுதிப்போட்டியும் மும்பையில் நடைபெறவுள்ளது. 

ஏப்ரல் 7-ந் தேதி நடைபெறவுள்ள முதல் போட்டியில் 2 ஆண்டு தடைக்குப் பின்னர் களமிறங்கவுள்ள சென்னை சூப்பர் கிங்ஸ் அணியுடன் நடப்பு சாம்பியன் மும்பை இந்தியன்ஸ் மோதுகிறது.

இதையடுத்து சென்னை சூப்பர் கிங்ஸ் அணி வீரர்கள் கடந்த ஒருவார காலமாக சென்னை சேப்பாக்கம் மைதானத்தில் தீவிர பயிற்சியில் ஈடுபட்டு வருகின்றனர். 2 வருட தடைக்குப் பின்னர் மீண்டும் களமிறங்கியுள்ளதால், பயிற்சியை பார்க்கவே சேப்பாக்கம் மைதானத்தில் பெரும் கூட்டம் கூடுகிறது.

சென்னை சூப்பர் கிங்ஸ் அணி தரப்பில் சமூக வலைதளங்களில் தங்களின் பயிற்சி விடியோக்கள் மற்றும் புகைப்படங்களை பதிவேற்றம் செய்து வருகிறது. இதுவும் சிஎஸ்கே ரசிகர்களால் இணையத்தில் அதிகளவில் பகிரப்பட்டு வரவேற்பை பெற்று வருகிறது. 

இந்நிலையில், காலா டீசரில் சென்னை சூப்பர் கிங்ஸ் அணி இடம்பெற்றுள்ளது போன்ற விடியோ ஒன்று தற்போது வெளியாகி வைரலாகப் பரவி வருகிறது. அதில், மகேந்திர சிங் தோனி, முரளி விஜய், ஹர்பஜன் சிங், டுவைன் பிராவோ உள்ளிட்ட வீரர்கள் இடம்பெற்றுள்ளனர்.

இந்த விடியோவில், டீசரில் புகழ்பெற்ற வசனமான 'கியாரே செட்டிங்கா' எனும் வசனம் 'தல' தோனி பேசுவது போன்று இடம்பெற்றுள்ளது குறிப்பிடத்தக்கது.