நியூஸிலாந்துக்கு எதிரான ஒருநாள் தொடரில் 0-3 என இந்திய அணி தோல்வியடைந்துள்ளது. இந்நிலையில் ஒருநாள் தரவரிசைப் பட்டியலில் இந்தியப் பந்துவீச்சாளர் பும்ரா இரண்டாம் இடத்துக்கு இறங்கியுள்ளார்.

ஒருநாள் தொடரில் ஒரு விக்கெட்டும் எடுக்காமல் அதிர்ச்சியளித்த பும்ரா, தொடருக்கு முன்பு பந்துவீச்சாளருக்கான ஒருநாள் தரவரிசைப் பட்டியலில் முதலிடத்தில் இருந்தார். இந்நிலையில் 3 ஆட்டங்களில் விளையாடியும் ஒரு விக்கெட்டும் எடுக்காததால் 45 புள்ளிகளை இழந்து தரவரிசைப் பட்டியலில் முதலிடத்தை இழந்துள்ளார்.

நியூஸிலாந்தின் டிரெண்ட் போல்ட், இரண்டாம் இடத்திலிருந்து முதலிடத்துக்கு முன்னேறியுள்ளார். அவர் இந்தியாவுக்கு எதிரான ஒருநாள் தொடரில் காயம் காரணமாகப் பங்கேற்கவில்லை. 2-ம் இடத்தில் பும்ராவும் 13-ம் இடத்தில் சஹாலும் உள்ளார்கள்.

பேட்ஸ்மேன்கள் தரவரிசையில் இந்திய கேப்டன் கோலி, முதலிடத்தைத் தக்கவைத்துக்கொண்டுள்ளார். ஒருநாள் தொடரில் பங்கேற்காத ரோஹித் சர்மா, 2-ம் இடத்தில் உள்ளார்.