தோஹா: கத்தாா் ஓபன் டென்னிஸ் போட்டியில் அமெரிக்காவின் மேடிசன் கீஸ் 3-ஆவது சுற்றுக்கு முன்னேறினாா்.

2-ஆவது சுற்றில், போட்டித்தரவரிசையில் 6-ஆவது இடத்தில் இருந்த ஸ்விட்சா்லாந்தின் பெலின்டா பென்சிச்சை 6-4, 6-1 என்ற செட்களில் வீழ்த்தினாா் கீஸ். மற்றொரு சுற்றில் ஜப்பானின் மிசாகா டோய் 6-4, 6-3 என்ற செட்களில் சீனாவின் ஜெங் சாய்சாயை வென்றாா்.

செக் குடியரசின் கரோனா பிளிஸ்கோவா 2-6, 3-6 என்ற செட்களில் ரஷியாவின் அனஸ்தாசியா பாவ்லியுசென்கோவாவிடம் வீழ்ந்தாா். டுனீசியாவின் ஆன்ஸ் ஜெபுா் 6-2, 6-2 என்ற நோ் செட்களில் ரஷியாவின் அனா பிலின்கோவாவை தோற்கடித்தாா். ஜொ்மனியின் லாரா சிக்மண்ட் 7-6 (9/7), 7-6 (7/5) என்ற செட்களில் கஜகஸ்தானின் எலனா ரைபாகினாவை போராடி வீழ்த்தினாா். அமெரிக்காவின் ஜெஸிகா பெகுலா 6-3, 6-1 என்ற செட்களில் சீனாவின் வாங் கியாங்கை வென்றாா்.

அரையிறுதியில் சானியா ஜோடி

கத்தாா் ஓபன் இரட்டையா் பிரிவில் இந்தியாவின் சானியா மிா்ஸா/ஸ்லோவேனியாவின் ஆண்ட்ரியா கிளெபாக் இணை தனது காலிறுதியில் 6-2, 6-0 என்ற செட்களில் போட்டித்தரவரிசையில் 2-ஆவது இடத்திலிருந்த கனடாவின் கேப்ரியேலா டப்ரௌஸ்கி/ரஷியாவின் அனா பிலின்கோவா ஜோடியை வீழ்த்தியது.